Եվրոպացի պատգամավորները Եվրանեսթ ԽՎ-ում շեշտել են գերիներին վերադարձնելու Ադրբեջանի պարտավորությունը

Եվրանեսթ խորհրդարանական վեհաժողովում եվրոպացի պատգամավորները շեշտել են, որ Ադրբեջանը պետք է կատարի իր պայմանավորվածությունները՝ վերադարձնելով հայ ռազմագերիներին:
Այս մասին հայտնեցին հայկական պատվիրակության անդամները՝ մանրամասներ ներկայացնելով ապրիլի 19-20-ը առցանց տարբերակով անցկացված նիստերից:
Ապրիլի 19-ին տեղի են ունեցել Տնտեսական ինտեգրման, Եվրամիության քաղաքականությունների հետ իրավական մոտարկման եւ համապատասխանեցման, Սոցիալական, աշխատանքի, կրթության, մշակույթի եւ քաղաքացիական հասարակության, Էներգետիկ անվտանգության եւ Քաղաքական, մարդու իրավունքների եւ ժողովրդավարության հարցերի հանձնաժողովների նիստերը: Վիկտոր Ենգիբարյանը, որը քաղաքական հարցերով հանձնաժողովի անդամ է, նշեց, որ այս անգամ հանձնաժողովն իր բանաձեւում անդրադարձել է Արեւելյան գործընկերության երկրներում եվրոպական ինտեգրման հարցերին: Առանձնահատուկ ուշադրության է արժանացել այն հանգամանքը, որ մարտի 1-ից արդեն ուժի մեջ է մտել ՀՀ-ԵՄ Համապարփակ եւ ընդլայնված գործընկերության համաձայնագիրը: «Արեւելյան գործընկերության 3 պետություններ ունեն  ասոցացված համաձայնագիր ԵՄ-ի հետ, եւ մեզ համար կարեւոր էր շեշտադրումներ կատարել մեր համաձայնագրին եւ եվրոպացի գործընկերների ուշադրությունն ուղղել այդ փաստի վրա»,-ընդգծեց պատվիրակության ղեկավարը:
Վեհաժողովում քննարկվել են նաեւ COVID-19-ով պայմանավորված խնդիրները, բանավեճի ընթացքում ելույթներ են ունեցել հայկական պատվիրակության անդամները:
«Մեզ համար կարեւոր է շեշտադրումներ կատարել նոյեմբերի 9-ի հայտարարությամբ պայմանավորված ռազմագերիների վերադարձի հարցին, որի պարտավորությունն ադրբեջանական կողմը, ցավոք, ամբողջությամբ չի կատարել: Պետք է ասեմ, որ այս հարցի շուրջ եվրոպացի գործընկերների մոտ կա լայն կոնսենսուս: Ոչ միայն մեր պատվիրակները, այլ նաեւ եվրոպացի մի շարք պատգամավորներ ելույթ ունեցան եւ նշեցին, որ Ադրբեջանն անպայման պիտի կատարի պայմանավորվածությունները»,-արձանագրեց Վիկտոր Ենգիբարյանը:
Անդրադարձ է կատարվել Ադրբեջանում իրականացվող հայատյացության քաղաքականությանը, այսպես կոչված «ռազմական ավարի պուրակի» խայտառակ պատմությանը, հայկական մշակութային ժառանգության պահպանությանը:
Լիագումար նիստի սկզբում ուղերձով հանդես են եկել ՀՀ ԱԺ նախագահ Արարատ Միրզոյանը, Եվրոպական խորհրդարանի նախագահը: Ելույթներ են ունեցել Ուկրաինայի, Վրաստանի խորհրդարանների ղեկավարները: «Ադրբեջանի Միլի Մեջլիսի նախագահը ելույթ չունեցավ, ինչը մեզ հուշում է, որ ադրբեջանական կողմը բավարարված չէ Եվրանեսթի աշխատանքներով, քանի որ նրանց առաջադրած բոլոր հակահայկական կետերը բանաձեւերից դուրս են մղվել»,-փաստեց Ենգիբարյանը:
Պատվիրակության անդամ Տարոն Սիմոնյանը տեղեկացրեց, որ Տնտեսական հարցերով հանձնաժողովում դեռեւս երկու տարի առաջ մեր պատվիրակությունն առաջարկել էր կրթության եւ տնտեսության սիներգիային վերաբերող բանաձեւ քննարկել, ինչը քննարկվել եւ ընդունվել է: 100-ից ավելի առաջարկների զգալի մասն ընդունվել է պատվիրակության եւ Եվրանեսթի պատգամավորների կողմից:
Էներգետիկ հարցերով զբաղվող հանձնաժողովի աշխատանքները ներկայացրեց Արման Եղոյանը: Ավանդույթի համաձայն՝ ադրբեջանցիները բարձրացրել են սովետական ատոմակայանների հարցը՝ բնականաբար, նկատի ունենալով հայկական ատոմոկայանը: «Բայց ինչպես նախորդ բոլոր դեպքերում, իրենց առաջարկները (ուշադիր լինել, սովետական երկրների ատոմակայանների անվտանգության հարցում աչալուրջ լինել, փակել դրանք) տապալվեցին: Սա տեղեկություն է այն մարդկանց համար, որոնք շահարկում են ատոմակայանի թեման, թե մենք այնտեղ խնդիրներ ունենք: Անգամ խորհրդարանական վեհաժողովի մակարդակով փաստվեց, որ ոչ տեխնիկական եւ ոչ էլ քաղաքական խնդիր կա»,-ընդգծեց Եղոյանը