«Հաճախ ենք մենք, մեղադրանքների ու պարտության ներքո, խեղճացել, քանի որ մա՛րդ ենք, դավաճան լինեինք՝ չէինք խեղճանա». Նիկոլ Փաշինյան․ Տեսանյութ

Ձեզնից յուրաքանչյուրի պահվածքն ու դիրքորոշումը այն ամենակարևոր արժեքներից է, որ ուժ է տալիս մեզ: Մենք պատերազմի ծանր փորձությունից հետո միայն ու միայն ժողովրդի դիրքորոշման շնորհիվ է, որ մինչ այսօր Հայաստանի կառավարության դերում ենք և ես վստահ եմ՝ նա առաջիկա ընտրություններում իր հստակ դիրքորոշումը ասելու է, որը կազմվելու է ճշմարտության ու արդարության հիման վրա: Այս մասին այսօր՝ Նոր-Նորքի ՔՊ համակիրների հետ հանդիպման ժամանակ, ասաց վարչապետի ժամանակավոր պաշտոնակատար Նիկոլ Պաշինյանը:

«Մենք անընդհատ քննարկում ենք. Կարո՞ղ է իրոք այդ աթոռից կառչած լինելու բանաձևը կա, որի հավանականությունը մենք պետք է չունենանք: Բայց այս հարցում էլ են մարդիկ որոշում կայացրել: Մենք ինչքան ստացել ենք մեղադրանք՝ դավաճան լինելու համար, կրկնակի, երառկի, քառակի անգամ ստացել ենք հորդոր, որ, եթե հանկարծ դուք էս պայքարի դիրքը թողնեք, այ էդ ժամանակ կլինեք իրական դավաճան», - նշեց նա:

Փաշինյանի խոսքով՝ բացառված է, որ Հայաստանն ու Ադրբեջանը գային ընդհանուր հայտարարի. բանակցությունների 30 տարիները դա ցույց են տվել: Ըստ նրա՝ երկրաշարժը պետք է լիներ, այլ հարց է՝ երկրաշարժից մեր կառույցը փլուզում պիտի ունենար, թե՝ չէ: 

«2018 թվականին, երբ մենք եկել ենք իշխանության, մենք գիտացել ենք, որ երկրաշարժը անխուսափելի է, և հուսահատ կերպով փորձել ենք ամրացնել այն շենքը, որի կառուցման ընթացքում ցեմենտն ու արմատուրան տարել են: Այդ շենքը չի դիմացել,բայց, եթե որևէ մեկն ասի, որ մենք ինչ-որ բան խնայել ենք շենքը պատշաճ ձևով ամրացնելու համար, դա իրականության հետ որևէ կապ չի ունենա», - նշեց Փաշինյանը:

Նա արված աշխատանքների օրինակներ բերեց, նշելով, որ այս իշխանությունները մեկ ու կես տարում 500 միլիարդ դրամով պետական բյուջեի եկամուտ են ավելացրել. «Դուք պատեկրացնո՞ւմ եք, ընդամենը 1,5 տարում: Երբ ես հեղափոխության ժամանակ դաշտերում հարցազրույց էի տալիս, ասում էի, որ կարելի է 2 տարում բյուջեի եկամուտները 40 տոկոսով ավելացնել, և մենք 2019 թվականի արդյունքներով 45 տոկոսով ավելացրինք: Մենք 25 տոկոսով բանակի բյուջեն ավելացրինք՝ միայն 2019 թվականին, ահռելի քանակությամբ զենք զինամթերք ձեռք բերեցինք»:

Նրա խոսքով կարևոր է նշել, որ որոշումը, թե ինչ զենք է պետք գնել, կառավարությունը չի որոշել: «Մենք զինվորական չենք, մենք չենք դրա մասնագետը: Մենք ասել ենք՝ ֆինանասավորում ենք, ինչի վրա պետք է, թող ծախսվի՝ խրամուղիներ, ապաստարաններ: Մենք ոչ մի բանի վրա չենք խնայել: Չի եղել այնպիսի բան, որ 2018-ից հետո մեզ ասեն սենց զենքա պետք, մենք ասենք՝ փող չկա, այդ զենքը թող չլինի: Հիմա մեզ ասում են՝ դա պետք էր, պետք չէր: Իհարկե, դա պետք էր ու պետք է»:

Ըստ Փաշինյանի, սակայն 2018 և 2020 թվականների տրամաբանությամբ չեն նրանք նայել այս հարցին. «Ես Ազգային Ժողովի ամբիոնից 2015 թվականին կառավարությանը  քննադատել եմ, ասել եմ՝ չեք էլ ամաչում, ասում եք Հայաստանը կործանիչ ավիացիա չունի: Բա ձեր բանուգործի անունն ի՞նչ ա, որ Հայաստանը 25 տարի անկախությունից հետո կործանիչ ավիացիա չունի: Ես վարչապետ եմ դարձել և, այո,առաջին գործերից մեկը բազմաֆունկցիոնալ ավիացիայի ձևավորումն էր, որի մեջ նաև կործանիչն է մտնում»:

Նա նշեց, որ այս ամենն անուրանալի է. «Մենք զինվորի հարց ենք լուծել, զինվորի ծնողի բժշկական հարց ենք լուծել: Մարտունակությունը միայն զենքը չի: Մենք ասել ենք՝ զինվոր, պետությունը քո ծնողի բուժման գումարը կտա, դու քո ծառայությամբ զբաղվիր»:

Նրա խոսքով՝ իհարկե, շատ հաճախ են նրանք մեղադրանքների, նաև պարտության ներքո, խեղճացել:

«Քանի որ մա՛րդ ենք մենք, քանի որ դավաճան չե՛նք: Դավաճան լինեինք՝ չէինք խեղճանա: Ընդհակառակը, հանցագործը հանցագործություն անելուց հետո գոհ է մնում, որ դա ի կատար ածեց: Աստված չաներ մեր ժամանակ հոկտեմբերի 27 լիներ, մենք էլի կխեղճանայինք: Դուք չէիք խեղճացել: Ընդհակառակը, բերաններդ մինչև ատամները քշտած պտտվում էինք», - ասաց Փաշինյանը: