Երեկ մեր ընդդիմադիր դաշտում սուգ ու ողբ էր մեր գերեվարվածների վերադարձի առթիվ. Փաշինյանը՝ Եղվարդում․ Տեսանյութ

«Երեկ հայ հանրությունը ուրախություն էր ապրում մեր 15 գերեվարվածների վերադարձի հետ կապված: Երեկ մեր ընդդիմադիր դաշտում սուգ ու ողբ էր՝ էլի կապված մեր 15 գերեվարվածների վերադարձի հետ: Այնպիսի տպավորություն է, որ ընդդիմությունը հաշվարկել կամ երաշխիք է ստացել, որ գերիները, գոնե առաջիկայում, չեն վերադառնալու, հիմա էլ սուգ ու շիվան են դրել, թե մեր քարտեզները տվել են, մեր ունեցած-չունեցածը տվել են»,- այսօր՝ հունիսի 13-ին, նախընտրական քարոզարշավի շրջանակներում Կոտայքի մարզ կատարած այցելության ժամանակ Եղվարդում հայտարարեց ՀՀ վարչապետի պաշտոնակատար Նիկոլ Փաշինյանը:

Նա կրկնեց, որ, այո, ականապատ դաշտերի քարտեզներ վերադարձվել են Ադրբեջանին. «Բայց տպավորություն են ուզում ստեղծել, թե մենք ինչքան ունեինք, ամենը վերադարձրել ենք: Ամենևին այդպես չէ. վերադարձվել է մի փոքր մասը, բայց չեմ կարող ասել ոչ շոշափելի մասը:

Դեռևս անցած տարվա դեկտեմբերից որոշակի քանակի քարտեզներ փոխանակվել են, դրանք այն քարտեզներն են, որոնք մեր միջև չեն և գտնվում են ադրբեջանական կողմի թիկունքում: Մենք ոչ թե քարտեզները փոխանակել ենք գերիների հետ, այլ քայլի դիմաց արել ենք քայլ»:

Նրա խոսքով՝ 15 ընտանիք վերագտել է իրեն, և դա հույս է մյուս ընտանիքների համար. «Սա պետք է լինի շարունակական: Եկեք բարի վերադարձ մաղթենք ոչ միայն նրանց, ովքեր վերադարձել են, այլև նրանց, ովքեր պիտի գան»:

Նիկոլ Փաշինյանը ներկայացրեց նաև, թե ինչպես են պատկերացնում երկրի անվտանգության ապահովումը. «Շատ կարևոր են մեր միջազգային հարաբերությունները և հայ-ռուսական հարաբերությունների զարգացումը»: