«Ռուսաստանն արդեն պարտվել է այս պատերազմում». Սալիվանը՝ Ուկրաինա ռուսական ներխուժման տարելիցի մասին

ԱՄՆ նախագահի ազգային անվտանգության հարցերով խորհրդական Ջեյք Սալիվանը CNN հեռուստաալիքի հատուկ եթերում՝ նվիրված Ուկրաինա ռուսական լայնամասշտաբ ներխուժման մեկնարկի տարելիցին, ասել է, որ Ռուսաստանն «արդեն պարտվել է այս պատերազմում»։

«Այս պատերազմում Ռուսաստանի նպատակներն էին Ուկրաինան ջնջել աշխարհի քարտեզից, գրավել մայրաքաղաքը և ոչնչացնել Ուկրաինան, կուլ տալ այն»,- ասել է Սալիվանը: «Նրանց դա չհաջողվեց, և նրանք այլևս չեն կարողանա դա անել»,- ընդգծել է նա։ 

Սալիվանը նաև ասել է, որ ԱՄՆ-ն իր հերթին անում է հնարավոր ամեն ինչ՝ Ուկրաինային անհրաժեշտ ռազմական օգնություն տրամադրելու համար։ Այնուամենայնիվ, նրա խոսքով, F-16 կործանիչները, որոնք խնդրում է Ուկրաինան, այս պահին «առանցքային անհրաժեշտություն չեն»: «F-16-ը Ուկրաինայի երկարաժամկետ պաշտպանության հարց է, այլ ոչ թե կարճաժամկետ պայքարի»,- ասել է նա։