Կիևի արվարձաններում կրկին պայթյուններ են հնչել, Չեռնիգովը գնդակոծվել է

Այսօր առավոտյան կրկին պայթյուններ են լսվել Կիևի արվարձաններում։ Տեղեկություններ կան Հոստոմելի, Բուչայի և Իրպենի շրջանում մարտերի և գնդակոծությունների մասին։

Չեռնիգովի վարչակազմի ղեկավար Վյաչեսլավ Չաուսը հայտնել է քաղաքի և շրջակա տարածքների գիշերային գնդակոծությունների մասին։ Նրա փոխանցմամբ՝ գնդակոծության հետևանքով վնասվել են բնակելի շենքեր, ենթակառուցվածքներ, գրադարաններ, առևտրի կենտրոններ։

Տեղական ժամանակով առավոտյան ժամը 8։30-ի սահմաններում Դոնեցկում արկը հարվածել է բազմահարկ բնակելի շենքին։ Հաղորդվում է երկու մարդու մահվան մասին։

Հրթիռակոծությունների մասին տեղեկություններ են ստացվում նաև Լիսիչանսկից, Ավդեևկայից, Մարինկայից, Կրասնոգորովկայից։ Հաղորդվում է Նովոմիխայլովկայի վրա հնարավոր ավիահարվածի մասին։

Պայթյուններն ու հրետակոծությունները շարունակվում են Խերսոնի շրջանի տարբեր հատվածներում։

Մարիուպոլում իրավիճակն անփոփոխ է՝ շրջափակում և փողոցային մարտեր։ Քաղաքում մնացել են տասնյակ հազարավոր խաղաղ բնակիչներ։

Ուկրաինայի փոխվարչապետ Իրինա Վերեշչուկի փոխանցմամբ՝ երեկ երեք հումանիտար միջանցք է համաձայնեցվել․ Մարիուպոլի բնակիչների տարհանման և Բերդյանսկ մարդասիրական օգնություն հասցնելու համար, մարդասիրական օգնության տրամադրման և Մելիտոպոլից մարդկանց տարհանման համար, Էներգոդարից Զապորոժիե անձնական ավտոմեքենաներից կազմված շարասյան անցնելու համար։

Աղբյուր՝  azatutyun.am