«Երկխոսության դռները միշտ բաց չեն լինելու». Իրանի ԱԳ նախարարը՝ միջուկային գործարքի հարցով բանակցությունների մասին

Իրանի խորհրդարան է ներկայացվել օրինագիծ, որով նախատեսվում է Գործողությունների համատեղ համապարփակ ծրագրի շուրջ բանակցությունների անցկացման համար առավելագույն ժամկետ սահմանել։ Այս մասին «Ալ Ջազիրա» հեռուստաալիքին տված հարցազրույցում ասել է Իրանի արտգործնախարար Հոսեյն Ամիր Աբդոլլահիանը։

«Իրանի խորհրդարան է ներկայացվել օրինագիծ՝ միջուկային գործարքի (վերադառնալու) հարցով բանակցությունների անցկացման համար առավելագույն ժամկետ սահմանելու մասին... Երկխոսության դռները միշտ բաց չեն լինելու»,- հայտարարել է Իրանի ԱԳ նախարարը։

Ավելի վաղ հաղորդվել էր, որ Իրանի փոխարտգործնախարար Ալի Բաղերի Քիանին Օսլոյում բանակցություններ է վարել Մեծ Բրիտանիայի, Ֆրանսիայի և Գերմանիայի դիվանագետների հետ, կողմերը քննարկել են Գործողությունների համատեղ համապարփակ ծրագրի վերականգնման ուղիները։ Բանակցություններին մասնակցել է նաև Եվրամիության արտաքին քաղաքականության ծառայության ղեկավարի տեղակալ Էնրիկե Մորան, որը հանդիսանում է միջուկային գործարքի շուրջ Վիեննայի բանակցությունների համակարգողը։