Ուկրաինայի հետ պատերազմը կշարունակվի՝ հանուն «հարյուրամյակների խաղաղության». Պեսկով

Ռուսաստանը համաձայն չէ Ուկրաինայի հետ հրադադարին, քանի որ դա թույլ կտա Կիևին վերականգնվել ռուսական բանակի հասցրած վնասից հետո, հայտարարել է Ռուսաստանի նախագահի մամուլի քարտուղար Դմիտրի Պեսկովը։


«Մենք թույլ չենք տա Կիևի ռեժիմի համար անել այնպիսի քայլ, որը թույլ կտա նրան բուժել վերքերը, լուրջ վերքերը, որոնք մենք հասցնում ենք այդ ռեժիմին»,- Պեսկովի խոսքերն է մեջբերում ՏԱՍՍ-ը։


Նրա խոսքով՝ Կրեմլը բանակցությունների միջոցով ձգտում է ապահովել երկարատև խաղաղություն։


«Ինչ վերաբերում է խաղաղության գործընթացին, մենք բազմիցս ասել ենք, որ չենք ուզում ժամանակավոր հրադադար, մենք ուզում ենք խաղաղություն երկար տարիների և հարյուրամյակների համար։ Ուստի հատուկ ռազմական գործողությունը կշարունակվի, իսկ բանակցային ուղին մեզ պետք է հասցնի այդ խաղաղությանը»,- հայտարարել է Պեսկովը՝ մեկնաբանելով Ուկրաինայի կողմից Ղրիմի կամրջի վրա գիշերային հարձակումը։


Պեսկովը հստակեցրել է, որ Մոսկվայի տեսանկյունից խաղաղության կարգավորումը «ժամանակի ընթացքում ձգվել» է և բաղկացած է «հսկայական թվով մասերից», որոնցից յուրաքանչյուրը կարևոր է։ «Աշխատանքը շարունակվում է»,- հայտարարել է Պուտինի մամուլի քարտուղարը։


Խոսելով Կրեմլի կամրջի վրա հարձակման մասին՝ Պեսկովը նշել է, որ օբյեկտը կրել է «աննշան վնաս»։ Նա հավելել է, որ մասնագետները շարունակում են գնահատել վնասի աստիճանը, իսկ կամրջով հաղորդակցությունը շարունակվում է։