Ադրբեջանի նախագահ Իլհամ Ալիևը ադրբեջանական հեռուստաալիքներին տված հարցազրույցում կրկին անդրադարձել է Հայաստանի Հանրապետության սպառազինմանը և նորից պայման առաջադրել՝ պահանջելով դադարեցնել Հայաստանին զինելը:

«Ֆրանսիան և զենք մատակարարող այլ երկրները պետք է խզեն ռազմական պայմանագրերը Հայաստանի հետ։ Զենքը, որը մատակարարվել է Հայաստանին, պետք է վերադարձվի: Սա մեր պայմանն է։

Ով ինչպես ուզում է, թող հասկանա։ Ես իմ խոսքն ասել եմ, և նրանք գիտեն, և նրանք, ովքեր կանգնած են նրանց հետևում, գիտեն, որ եթե մենք ինչ-որ բան ենք ասում, ապա շատ լուրջ ենք վերաբերվում հարցին»,- հայտարարել է Ալիևը:

Նա անդրադարձել է Հայաստանի ներկայիս ղեկավարի՝ 2018-2019թթ. ելույթներին և ասել. «Հայաստանի ներկայիս ղեկավարը, ինչպես ես արդեն ասել եմ, ցանկանում է ներկայանալ խաղաղության աղավնու կերպարով։ Բայց նայեք նրա ելույթները 2018-2019 թվականներին, որոնք հիմա ոչ ոք չի ցանկանում հիշել։ Նույնիսկ նրա ընկերները Ֆրանսիայում չեն ցանկանում հրաժարվել նրանից»։

Նրա խոսքով՝  Հայաստանում գոյություն ունի «Ֆաշիզմի գաղափարախոսություն»: «Դրա կրողներն են ոչ միայն ընդդիմությունը, այլ նաև Հայաստանի իշխանությունը։ Եվս մեկ անգամ ուզում եմ ասել, որ մենք պարզապես չենք հետևելու դրան։ Հայաստանը պետք է դադարեցնի զինվելը»,- հայտարարել է Ալիևը։