Շատ հրապարակումներում թյուրիմացություն կար. Այս օրենքը համայնքի ղեկավարների կրթական ցենզին չի անդրադառնում. Վաչե Տերտերյան

Այսօր՝ նոյեմբերի 12-ին, հրավիրվել է Ազգային ժողովի տարածքային կառավարման, տեղական ինքնակառավարման, գյուղատնտեսության և շրջակա միջավայրի պաշտպանության հարցերի մշտական հանձնաժողոի հերթական նիստը: Օրակարգի երկրորդ հարցը վերաբերում է Տեղական ինքնակառավարման մասին օրենքում փոփոխություններ և լրացումներ կատարելուն: Օրենքի նախագիծը արդեն իսկ ընդունվել է ԱԺ-ում առաջին ընթերցմամբ:

Ինչպես նշեց տարածքային կառավարման և ենթակառուցվածքների փոխնախարար Վաչե Տերտերյանը, շատ հրապարակումներում թյուրիմացություն կար. «Գրում էին համայնքի ղեկավարների կրթական ցենզ. այս օրենքը բոլորովին դրան չի անդրադառնում: Դա լուծված է շատ վաղուց. համայնքի ղեկավարների՝ որպես քաղաքական պաշտոն զբաղեցնող մարդկանց առջև կրթական պահանջ դրված չէ: Խոսքը վերաբերում է վարչական ղեկավարներին, որոնք բոլորը պետք է ունանային բարձրագույն կրթություն: Ես ինքս հակված եմ, որ բոլոր վարչական ղեկավարներն ունենան բարձրագույն կրթություն, և դա տրամաբանական է: Այլ բան է, թե դա ինչքան է հնարավոր»: