Պուտինի և Սի Ծինփինի հանդիպումը աշխարհաքաղաքականության նոր դարաշրջանի սկիզբ է նշանավորում

Ռուսաստանի և Չինաստանի համատեղ հայտարարությունը, որն ընդունվել է ՌԴ նախագահ Վլադիմիր Պուտինի Պեկին կատարած այցի ժամանակ, խորհրդանշում է անցումը միջազգային հարաբերությունների սկզբունքորեն նոր կառուցվածքի։ Այս տեսակետն ուրբաթ հայտնել է բրիտանական Daily Telegraph թերթը, փոխանցում է ՏԱՍՍ-ը։

Թերթը նշում է, որ Պուտինի հանդիպումը Չինաստանի նախագահ Սի Ծինփինի հետ, որը տեղի է ունեցել «միջազգային լուրջ լարվածության» ժամանակաշրջանում, նշանավորում է «նոր աշխարհաքաղաքական դարաշրջանի» սկիզբը։ Ըստ թերթի՝ «այսուհետ ԱՄՆ-ի գլխավորությամբ Արևմուտքի գլոբալ գերակայությունն այլևս չի հանդուրժվի»։

Ինչպես նշում է Daily Telegraph-ը «տասնամյակների նվաստացումից հետո» Ռուսաստանն ու Չինաստանը «այժմ շրջելու են սառը պատերազմից հետո ձևավորված անարդար աշխարհակարգը»: Միևնույն ժամանակ, այս իրավիճակում Պուտինին անվանում են «անմիջական հաղթող»։ Թերթը նշում է, որ որպես դաշնակից Չինաստանի ներկայությունը թույլ կտա Ռուսաստանին ամրապնդել իր դիրքերը համաշխարհային քաղաքական թատերաբեմում, ինչպես նաև մեղմել Արևմուտքի կողմից հնարավոր պատժամիջոցների հետևանքները Ուկրաինա ռուսական հիպոթետիկ ներխուժման դեպքում։

Ըստ թերթի՝ Չինաստանի աջակցությունը երաշխիքների հարցով Ռուսաստանի պահանջներին՝ ուղղված ԱՄՆ-ին և ՆԱՏՕ-ին, կարող է օգտագործվել Ռուսաստանի կողմից որպես հաղթաթուղթ արևմտյան երկրների հետ երկխոսության համար։ The Daily Telegraph-ը նաև ընդգծում է, որ Չինաստանի և Ռուսաստանի սերտ գործընկերությունը թույլ չի տալիս ԱՄՆ-ին վերջնական կենտրոնացնել ուշադրությունը Խաղաղօվկիանոսյան տարածաշրջանի իրավիճակի վրա, որը Վաշինգտոնի վարչակազմը համարում է արտաքին քաղաքականության առաջնահերթ ուղղություն։ Պարբերականը եզրակացնում է, որ Մոսկվան և Պեկինն այժմ կապված են ընդհանուր նպատակով, որն է «վերջ դնել Pax Americana-ին»։