Հուսով եմ՝ մեր իշխանությունները ճիշտ են հասկանում, որ Պուտինի խոսքերը պետք է հասկանալ հակառակ իմաստով․ Ստյոպա Սաֆարյան

Եթե ըստ Պուտինի' վաշինգտոնյան առաջարկով Արցախը մնում է Ադրբեջանի կազմում, ուրեմն Բաքուն օր առաջ պետք է ընդառաջ գնար դրան, ոչ թե Երևանը։ Մինչդեռ Վաշինգտոնից փախչողը Բաքուն է, ոչ թե Երևանը։ Ինչ է' Բաքուն չի ցանկանում Վաշինգտոնո՞ւմ «ստանալ» Արցախը․ ֆեյսբուքի իր էջում գրել է Միջազգային և անվտանգության հարցերի հայկական ինստիտուտի (ՄԱՀՀԻ) հիմնադիր Ստյոպա Սաֆարյանը՝ անդրադառնալով  ՌԴ նախագահ Վլադիմիր Պուտինի՝ «Վալդայ» ակումբում արված հայտարարությանը։

«Եթե Վաշինգտոնում Արցախը «տրվում է» Բաքվին, այդ դեպքում Պուտինի մտահոգությունները և խափանարար գործողությունները պետք է լինեին Բաքվի ուղղությամբ, մինչդեռ իր ելույթում հակառակն է...

Եթե ի տարբերություն Վաշինգտոնի պլանի ռուսական պլանով Արցախը չի մնում Ադրբեջանի կազմում, այդ դեպքում Պուտինն ինչո՞ւ է գրավոր ու բանավոր ճանաչում Ադրբեջանի տարածքային ամբողջականությունը, ոչ միայն պատերազմից առաջ, ընթացքում ու հետո, այլ հենց 2022թ. փետրվարի 22-ին...

Մարգոյի ասած' նաչալնիկի տրամաբանության մեջ լիքը խառը, հակասություններ կան...»,- գրել է Սաֆարյանը, ապա րոպեներ անց հավելել․

«Ես հուսով եմ' մեր իշխանությունները ճիշտ են հասկանում Ռուսաստանի նախագահի այն խոսքերը, որ եթե Հայաստանը որոշի ընդունել վաշինգտոնյան առաջարկությունը, ապա Ռուսաստանը կաջակցի իր դաշնակցին։ Այս խոսքերը ճիշտ պետք է հասկանալ հակառակ իմաստով, ինչպես որ հակառակ իմաստով պետք էր հասկանալ պատերազմի օրերին ռուսական պլանը չընդունելու դեպքում ասված «конечно, нет»-ը...

Բավական ռիսկաշատ վիճակ է, ու բոլորով միասնական, խելք խելքի տված, առանց հիստերիկաների պետք է հաղթահարենք, լուծենք մեր խնդիրները այնպես, ինչպես մեր ազգային շահն է պահանջում, այլ ոչ թե ինչպես մեզ դրսից ասվում է...»։