Կադաստրի կոմիտեում գույքի իրավունքների գրանցման համար ՀՀ քաղաքացիների փաստաթղթերը կներկայացվեն էլեկտրոնային եղանակով. ԱԺ հանձնաժողովը հավանություն տվեց նախագծին

Այսօր՝ դեկտեմբերի 1-ին, ԱԺ տնտեսական հարցերի մշտական հանձնաժողովը հավանություն տվեց «Գույքի նկատմամբ իրավունքի և պետական գրանցման մասին» օրենքում փոփոխություններ կատարելու մասին 2020թ. հունվարի 22-ի ՀՕ6-Ն օրենքը չեղյալ ճանաչելու մասին և «Գույքի նկատմամբ իրավունքների պետական գրանցման մասին» օրենքում փոփոխություններ և լրացումներ կատարելու մասին նախագծերին։

Նախագծի հիմնական զեկուցող՝ ՀՀ կադաստրի կոմիտեի պետի տեղակալ Սուրեն Թովմասյանը նշեց, որ Կադաստրի կոմիտեում իրավունքների գրանցման համար ՀՀ քաղաքացիները, սուբյեկտները ներկայացնում են քաղաքաշինական փաստաթղթեր՝ շինթույլտվություններ և այլն։ Մինչդեռ այս օրենքի փոփոխությամբ այդ փաստաթղթերը պետք է էլեկտրոնային եղանակով համայնքների՝ տրամադրող մարմինների կողմից ներկայացվեն Կադաստրի կոմիտե, և ներկայացման պահից դրանք համարվելու են ներկայացված՝ իրավունքների գրանցման համար. «Նպատակն է զերծ պահել քաղաքացիներին այդ ծավալուն փաստաթղթերն այս ու այն կողմ տանելուց, ինչպես նաև չեն ծանրաբեռնվի Կադաստրի կոմիտեի գրասենյակները, որտեղ սքանավորում են այդ փաստաթղթերը և ներմուծում տվյալների բազա։ Այս փոփոխությամբ այդ նույն փաստաթղթերը տպագրվում են էլեկտրոնային ֆայլից, և այդ ֆայլը հնարավոր է ներկայացնել համայնք կամ համապատասխան մարմին, որը հետո էլեկտրոնային հարթակի օգնությամբ կտրամադրի Կադաստրի կոմիտեին»։ 

Հանձնաժողովը միաձայն հավանություն տվեց՝ որոշումն ընդունվեց, հարցը կքննարկվի 24-ժամյա ընթացակարգով, որպեսզի օրենքն ուժի մեջ մտնի 2022թ. հունվարից։