«Համաս»-ը մերժել է մեկշաբաթյա հրադադարի մասին Իսրայելի առաջարկը

ԱՄՆ-ի և ԵՄ-ի կողմից ահաբեկչական կազմակերպություն ճանաչված «Համաս»-ը մերժել է տասնյակ պատանդների դիմաց Գազայի հատվածում ռազմական գործողությունները մեկ շաբաթով դադարեցնելու Իսրայելի առաջարկը, հայտնում է The Wall Street Journal-ը՝ վկայակոչելով Եգիպտոսի պաշտոնյաներին։

Երեկ Քաթարի մայրաքաղաք Դոհայում «Համաս»-ի լիդեր Իսմայիլ Հանիյան բանակցություններ է վարել Եգիպտոսի իշխանությունների ներկայացուցիչների հետ Գազայի հատվածում մարդասիրական նոր դադարի հնարավորության շուրջ, սակայն հանդիպումն, ըստ թերթի աղբյուրների, ավարտվել է անարդյունք։

The Wall Street Journal-ը տեղեկացնում է, որ Իսրայելը ձգտում է ազատ արձակել 40 պատանդների, ինչպես նաև շտապ բժշկական օգնության կարիք ունեցողների՝ դրա դիմաց առաջարկելով մեկ շաբաթով դադարեցնել ցամաքային և օդային գործողությունները Գազայի հատվածում և թույլատրել հումանիտար օգնություն հասցնել պաղեստինյան բնակչությանը։

Սակայն ծայրահեղական «Համաս»-ի պատվիրակության անդամները եգիպտացի միջնորդներին ասել են, որ ցանկացած հնարավոր գործարքի քննարկումից առաջ Իսրայելը նախ պետք է դադարեցնի հարձակումը, դուրս բերի իր զորքերը և բանտերից ազատի բոլոր պաղեստինցի բանտարկյալներին, հաղորդում է WSJ-ը՝ վկայակոչելով «Համաս»-ի հայտարարությունը։

Ավելի վաղ Իսրայելի արտաքին հետախուզական ծառայության՝ «Մոսադ»-ի ղեկավար Դեյվիդ Բարնեան հայտարարել է, որ եթե «Համաս»-ը ցանկանում է դադարեցնել պատերազմը, ապա պետք է վայր դնի զենքը և Իսրայելին հանձնի Գազայի հատվածում հոկտեմբերի 7-ի հարձակման համար պատասխանատու ղեկավարներին։

Նոյեմբերի վերջին հումանիտար առաջին հրադադարի ժամանակ երկու կողմից տասնյակ պատանդներ ու կալանավորված անձինք ազատ էին արձակվել, սակայն միջնորդներին չէր հաջողվել հասնել հրադադարի երկարաձգմանը։

Աղբյուր՝ azatutyun.am