Ադրբեջանն ու Ռուսաստանն իրագործում են 7,5 մլրդ դոլարի համատեղ նախագծեր

Ադրբեջանն ու Ռուսաստանի Դաշնությունը ներկայումս իրագործում են 14 համատեղ նախագիծ, որոնց ընդհանուր արժեքը 7,5 մլրդ դոլար է, հայտնել է Ռուսաստանի տնտեսական զարգացման փոխնախարար Դմիտրի Վոլվաչը։

«Ռուսաստանի և Ադրբեջանի միջև կապերը զարգանում են ոչ միայն պետությունների ղեկավարների մակարդակով, այլև տարածաշրջանների փոխգործակցության մակարդակով։ Ռուսական բիզնեսն այժմ մասնակցում է 14 խոշոր նախագծերի, որոնց ընդհանուր արժեքը գրեթե 7,5 մլրդ դոլար է: Ադրբեջանում ստեղծվում են ավտոմոբիլային և երկաթուղային մեքենաշինության նախագծեր, բացվում է առաջին դեղագործական արտադրությունը։ Եվ այս ամենը տեխնոլոգիայի և ռուս գործընկերների փորձի կիրառմամբ»,- ասել է Վոլվաչը։ 

Նրա խոսքով՝ Ռուսաստանի ավելի քան 70 տարածաշրջաններ համագործակցում են Ադրբեջանի հետ։ Նրանց մեկ քառորդն արդեն ունի առևտրատնտեսական, գիտատեխնիկական և մշակութային համագործակցության պայմանագրեր։ Միջտարածաշրջանային ապրանքաշրջանառության առաջատարներն են Մոսկվան, Կրասնոդարի և Ստավրոպոլի երկրամասերը, Մոսկվայի և Սվերդլովսկի մարզերը:

Առևտրային գործընկերների տասնյակում են Թաթարստանի Հանրապետությունը, Վոլգոգրադի ու Սարատովի մարզերը և Սանկտ Պետերբուրգ քաղաքը։