Պաշտպանության նախարարի օգնականի պարտականությունները առավելապես կազմակերպչական բնույթի են, որոնց կատարման համար պարտադիր չէ լինել ռազմական գործի մասնագետ

Վերջին օրերին հաճախ է  շահարկվում ՀՀ պաշտպանության նախարար Սուրեն Պապիկյանի  օգնականի  երիտասարդ ու ռազմական գործից հեռու  լինելու թեման: Խոսքը նախարարի օգնական 23-ամյա Մանե Մարկոսյանի մասին է, որը մինչ այս եղել է ՀՀ տարածքային կառավարման և ենթակառուցվածքների նախարարի օգնական, երբ նախարարը Պապիկյանն էր, անցած տարվա օգոստոսին էլ, երբ Պապիկյանը նշանակվեց փոխվարչապետի պաշտոնում,  Մանե Մարկոսյանը վերջինիս որոշմամբ նշանակվեց փոխվարչապետի օգնական:
 
Նկատենք, որ ՀՀ պաշտպանության նախարարության կանոնադրությամբ սահմանված են նախարարի օգնականի պարտականությունները:

Դրանք են. 

1. կազմակերպական, տեղեկատվական և տեխնիկական աջակցություն է ցուցաբերում նախարարին,  
2. համաձայնեցնելով նախարարի հետ՝ կազմակերպում է նախարարի ընթացիկ և հեռանկարային աշխատանքների ծրագրերի նախապատրաստումը և դրանք ներկայացնում նախարարին,                                                                                    
3. կազմակերպում է նախարարի խորհրդակցությունների, հանդիպումների, այցերի և ուղևորությունների նախապատրաստումը, 
4. համագործակցելով նախարարության աշխատակազմի կառուցվածքային ստորաբաժանումների աշխատողների հետ՝ նախարարի համար նախապատրաստում է տեղեկատվական և վերլուծական նյութեր,  
5. նախապատրաստում և նախարարին է ներկայացնում առաջարկություններ աշխատանքային ծրագրերի վերաբերյալ, 
6. կատարում է նախարարի կողմից տրված այլ հանձնարարականներ:

 
Ինչպես տեսնում ենք՝ օգնականի պարտականությունները առավելապես կազմակերպչական բնույթի են, և դրանց  կատարումը չի ենթադրում պարտադիր լինել ռազմական գործի մասնագետ կամ այլ նեղ ոլորտային  հմտությունների տիրապետել: Մարկոսյանը մասնագիտությամբ իրավաբան է, սովորել է  ԵՊՀ իրավագիտության ֆակուլտետում,  ՀՀ փաստաբանական դպրոց հիմնադրամում: 
Նկատենք նաև, որ նախարար Պապիկյանը նույնպես զինվորական  կրթություն չունի,  օրենքը նման պարտադիր պայման չի սահմանում նախարարի պաշտոնն զբաղեցնելու համար:ն

Ի դեպ, Մարկոսյանի նշանակման հարցը այսօր լրագրողները բարձրացրել են նաև ԱԺ-ում՝ պաշտպանության փոխնախարար  Արման Սարգսյանի հետ ճեպազրույցում:  «Պաշտպանության նախարարի օգնականը պետք է զինվորակա՞ն լինի, ես ինքս զինվորական չեմ և պաշտպանության նախարարի տեղակալն եմ, իմ առջև դրված խնդիրները, կարծում եմ, կարողանում եմ լուծել: Դուք զինված ուժերից ու պաշտպանության նախարարությունից այդքան էլ տեղեկացված չեք: Ընդհանրապես ԶՈՒ ղեկավարումն իրականացվում է Գլխավոր շտաբի կողմից: Իմ պաշտոնը քաղաքական պաշտոն է, և ես ձեզ տալիս եմ տեղեկատվություն այնքան, որքան կարող եմ ու որքան անհրաժեշտ է, հետևաբար պաշտպանության նախարարի օգնականի՝ զինվորական գիտելիքներ չունենալը որևէ խնդիր չի կարող լինել»,- հայտարարել է  Սարգսյանը: