Մեր հերոսների շիրիմներին ծաղիկներ խոնարհելով՝ խնկարկվեց նրանց անմար հիշատակը. ոչ-ոք չի մոռացվել, ոչինչ չի մոռացվել․ Ստեփանակերտի քաղաքապետարան

Մեկ տարի առաջ այս օրը Արցախի երկինքը դղրդաց: Մեր գրեթե բոլոր մեծ ու փոքր բնակավայրերը սև ծխի քուլաներում հայտնվեցին.
սկսվեց պատերազմ, որը պիտի տևեր 44 օր, պիտի խլեր հազարավոր կյանքեր, պիտի խեղեր բազում ճակատագրեր, պիտի կուլ տար մեր հայրենիքի մեծ մասն ու մեր երազանքները... Այսօր առավոտյան Հայաստանի և Արցախի բոլոր եկեղեցիներում կատարվել է հոգեհանգստյան արարողություն ի հիշատակ՝ աղետաբեր պատերազմում անմահացածների: Ստեփանակերտի Սուրբ Աստվածամոր Հովանի մայր եկեղեցում արարողությունը կատարվել է՝ հանդիսապետությամբ Արցախի թեմակալ առաջնորդ Գերաշնորհ Տեր Վրթանես եպիսկոպոս Աբրահամյանի ու մասնակցությամբ հոգևոր դասի: Աստծո տաճարի կամարների ներքո հնչեցված աղոթքներին միացել է նաև Ստեփանակերտի քաղաքապետարանի աշխատակազմը՝ քաղաքապետ Դավիթ Սարգսյանի գլխավորությամբ: Հետո ազդարարվեց մեկ րոպե լռություն, որի ավարտին ներկաները իրենց քայլերը ուղղեցին դեպի համահայկական սրբատեղիներից մեկը՝ Ստեփանակերտի Եղբայրական գերեզմանոց: Մեր հերոսների շիրիմներին ծաղիկներ խոնարհելով՝ խնկարկվեց նրանց անմար հիշատակը. ոչ-ոք չի մոռացվել, ոչինչ չի մոռացվել…