Այս նախագիծը ոչինչ չի փոխում․ ԱԺ բոլոր հանձնաժողովները զբաղվում են նաև Արցախի հարցերով․ Վլադիմիր Վարդանյանը՝ Աղվան Վարդանյանին

Այսօր՝ սեպտեմբերի 10-ին, ԱԺ պետաիրավական հարցերի մշտական հանձնաժողովի նիստում «Հայաստան» խմբակցության պատգամավոր Աղվան Վարդանյանը հիշատակեց, որ 8-րդ գումարման Ազգային ժողովի 1-ին նիստում «Պատիվ ունեմ» և «Հայաստան» խմբակցություններն առաջարկել էին հանձնաժողովների ձևավորման ընթացքում ձևավորել առանձին  Արցախի հարցերով հանձնաժողով, որի մասին քննարկում եղավ ԱԺ-ում, և մերժվեց այդ որոշումը. «Գտնում էին, որ մենք ունենք արտաքին հարաբերությունների հարցերի հանձնաժողով, և այդ հանձնաժողովի հիմնական գործառույթները պետք է լինեն նաև Արցախի հարցերը։ Բայց պետք է շեշտեմ, որ մեր 12 հանձնաժողովների գործառույթների մեջ որևէ բառ չկա Արցախի մասին։ Սակայն ես հիշում եմ ելույթներ, որ ասում էին՝ նոր հանձնաժողով պետք չի ստեղծել, ավելի ճիշտ է արտաքին հարաբերությունների հարցերի հանձնաժողովը վերանվանել արտաքին հարաբերությունների և Արցախի հարցերի հանձնաժողով»։  

Աղվան Վարդանյանը մեջբերեց նաև ԱԺ փորձագիտական և վերլուծական հարցերի հանձնաժողովի եզրակացության մեջ նշված արտահայտությունը՝ քանի որ կա արտաքին հարաբերությունների հարցերի հանձնաժողով, իմաստ չունի այն վերանվանել: «Սա, կարծում եմ, այս հանձնաժողովի քաղաքական գնահատականն է և այտեղի քաղաքական գնահատականն է»,- ասաց պատգամավորը։ 

ԱԺ ՔՊ խմբակցության պատգամավոր Արթուր Դավթյանը հետաքրքրվեց Աղվան Վարդանյանից՝ արդյոք Աղվան Վարդանյանն ուզո՞ւմ է անվանափոխվի հանձնաժողովի անունը, ու միայն մեկ խողովակով քննարկվեն Արցախի հարցերը, և մյուս 11 հանձնաժողովները ձեռնպահ մնան Արցախի հարցերը քննարկելուց։  

Ի պատասխան ՔՊ պատգամավորի՝ Աղվան Վարդանյանն արձագանքեց. «Մենք ունենք 12 հանձնաժողով, այդ թվում՝ եվրոպական ինտեգրման հարցերի և տարածաշրջանային եվրասիական ինտեգրման հարցերի հանձնաժողովներ, որոնց գործառույթներն առնչվում են արտաքին հարաբերությունների հարցերի մշտական հանձնաժողովին, բայց սա չի նշանակում, որ արտաքին հարաբերությունների հարցերի հանձնաժողովը ծածկում է ամբողջ դաշտը։ Ես չէի ուզենա, որ մեր խորհրդարանական բոլոր գործառույթները մենք նեղացնեինք ու տեղավորեինք միայն հանձնաժողովների աշխատանքների մեջ, ցանկացած հարց կարող է քննարկվել և հանձնաժողովներում, և ԱԺ լիագումար նիստերում»։  

ԱԺ պետաիրավական հարցերի հանձնաժողովի նախագահ, ՔՊ խմբակցության պատգամավոր Վլադիմիր Վարդանյանն էլ ընդգծեց, որ Արցախի հարցերը բազմաբովանդակ են, և ՀՀ ԱԺ բոլոր հանձնաժողովներն իրենց իրավասության սահմաններում զբաղվում են Արցախի հարցով։ Նրա խոսքով՝ բազում դեպքեր են եղել, երբ հարցը վերաբերել է պետաիրավական կամ տնտեսական հարցերի հանձնաժողովների ոլորտներին, բայց նախագծերն ուղարկվել են այլ հանձնաժողովներ։ 

Վլադիմիր Վարդանյանը հիշատակեց, որ ՀՀ կառավարության ծրագրում, որին ընդդիմությունը դեմ է քվեարկել, արտաքին հարաբերությունների և անվտանգության բաժնում հարցեր կան, որոնք վերաբերում են Արցախի Հանրապետության անվտանգությանը և կարգավիճակի հստակեցմանը։