Արցախի իշխանությանը կամ խաղաղապահներին մեղադրել սահմանամերձ շրջաններում մի քանի 100 մետր կորուստի համար` ծանծաղամտություն է. Արցախի ԱԺ փոխնախագահ

Civic.am-ի զրուցակիցն է Արցախի ԱԺ նախագահի տեղակալ, Արցախի նախկին ԱԽ քարտուղար Սամվել Բաբայանի «Միասնական հայրենիք» կուսակցության անդամ Գագիկ Բաղունցը:
 
-Պրն Բաղունց, Արցախի ՀՅԴ-ից մեզ տեղեկացրեցին, որ մերժել եք ռուսերենը ոչ թե պաշտոնական, այլ աշխատանքային լեզու դարձնելու իրենց առաջարկը, և ըստ այդմ Ձեր նախագիծն ընդունվել է: Ի՞նչ պատճառաբանությամբ եք մերժել:

-Աշխատանքային լեզու հասկացություն ոչ մի տեղ չկա, ՅՈՒՆԵՍԿՈ-ի փորձագետների սահմանումն է` պետական և պաշտոնական լեզուներ: Աշխատանքային լեզու հասկացությունը շրջանառության մեջ դրված է կենցաղային մակարդակով: Մենք պետություն ենք կառուցում ոչ թե ինչ-որ կենցաղային մակարդակի մոտեցումներով, այլ քաղաքակիրթ աշխարհում ընդունված սահմանումների համաձայն: 

-Հայաստանում կան կարծիքներ, որ արցախցիները դեմ չեն լինի Ռուսաստանի ներքո ապրել, կա՞ն նման միտումներ:

-Եթե մենք ցանկություն ունենայինք Ռուսաստանի ներքո ապրել ,ռուսերենը կընդունեինք որպես պետական լեզու, այլ ոչ թե պաշտոնական: Որպեսզի մենք շատ ու շատ սպառնալիքներից ու պրոբլեմներից խուսափենք և երկիրն արագ ճգնաժամից դուրս բերենք` գնացել ենք այդ քայլին: Մենք ռուս խաղաղապահների հետ` սկսած ռազմական , պաշտպանության, անվտանգության խնդիրներից, շփումներ ունենք, անմիջապես իրենց հետ, և բազմաթիվ հարցեր կան, որոնք թղթաբանության հետ են կապված: Նրանց ինժեներական զորքերը մեզ լուրջ օժանդակություն են ցուցաբերում: Նշեմ, որ Արցախում բոլոր օրենքները ձևակերպվելու են բացառապես հայերեն` մեր պետական լեզվով, ռուսերենով ոչ մի օրենք չի գրվելու:

-Ռուս  խաղաղապահների օրոք Ադրբեջանը ռազմական գործողություններ իրականացրեց չորս համայնքների ուղղությամբ, որից երկուսը` Խծաբերդն ու Հին Թաղերն անցան Ադրբեջանի տիրապետության տակ: Օրերս էլ BBC-ն էր անդրադարձել Մեխակավանի` Ջաբրայիլի Սուրբ Աստվածածին եկեղեցու հիմնահատակ ավերմանը: Ինչպե՞ս եք գնահատում ռուս խաղաղապահների ազդեցությունն Արցախում:

-Ձեր թվարկած փաստերը որոնք տեղի են ունեցել Ադրբեջանի հսկողության տակ գտնվող տարածքներում այնտեղ խաղաղապահ ուժեր չկան: Խաղաղապահները սահմանին են տեղակայված և Լաչինի միջանցքի երկայնքով: Ինչի մենք այսօր պետք է ճանաչենք թուրքերին, կամ ադրբեջանցիներին, այդ հարցերում զարմանալ պետք չի: 

-Իսկ Խծաբերդն ու Հին թաղերը վերջ ի վերջո հասկանալի դարձա՞վ թե ինչու նոյեմբերի 9-ի եռակողմ հայտարարությունից հետո, երբ զորքը պետք է մնար իր կանգնած դիրքում, անցավ Ադրբեջանի տիրապետության տակ, այն էլ ռազմական գործողությունների արդյունքում:

-Ես հիմա այդ հարցը չեմ ուզում քննարկեմ, հատկապես, որ Հայաստանում չեն խոսել, բայց ասեմ, որ բոլոր նման սահմանամերձ շրջանների խնդիրները լուծվում են թե սովետի ժամանակից մնացած, թե պոստսովետական քարտեզներով: Դժգոհություն ինձ մոտ էլ կա, որ նման աշխատանքները մասնագիտական ապահովում չեն ստացել մեր կողմից և թե մի քանի մետրի, թե մի քանի հարյուր մետրի մենք կորուստներ ունեցանք, դա առանձին հարց է` մասնագետների կողմից ճշգրտելու խնդիր կա: Բայց մտածել, որ Արցախի իշխանությունների կողմից  ինչ-որ նման բացթողումներ կամ խաղաղապահների կողմից միտումնավոր մոտեցումներ կան` դա կարծում եմ ծանծաղամտություն է:

-Ո՞ր երկրների հետ եք պատկերացնում, որ Արցախը կարող է ունենալ դաշնակցային հարաբերություններ:

-Այսօր մեր հիմնական դաշնակիցը տեսնում ենք Ռուսաստանի Դաշնությանը, Հայաստանի Հնարապետությունից բացի, և դրա հետ կապված մյուս պետությունների հետ կառուցելու ենք մեր հարաբերությունները: Իսկ Ադրբեջանի հետ մենք եզրեր չունենք ոչ դաշնակցային, ոչ հարևանական հարաբերությունների, միայն ռազմական հակազդեցություն է այսօրվա դրությամբ:
 
Նարա Մարտիրոսյան