Ռուս «ռազմական թղթակիցը» ինքնասպանություն է գործել. նա գրել է ՌԴ բանակի հսկայական կորուստների մասին

Ռուս «ռազմական թղթակից» Անդրեյ Մորոզովը, որը որպես ավագ սերժանտ երկար ժամանակ ծառայել է ԴԺՀ-ի ռազմականացված կազմավորումներում, ենթադրաբար ինքնասպանություն է գործել, ինչպես հաղորդվում է՝ ռուս պաշտոնական քարոզիչների կողմից հետապնդումների պատճառով:

Մորոզովի ինքնասպանությունը հաստատել են Իգոր Ստրելկովի տիկինը՝ Միրոսլավա Ռեգինսկայան, փաստաբան Մաքսիմ Պաշկովը և ռուսական Z-ալիքները։

Մորոզովի վերջին հաղորդագրությունները Telegram-ի իր ալիքում (ունի ավելի քան 100 հազար բաժանորդ) եղել են մահվանից առաջ գրություն և կտակ, ինչպես նաև ուղերձ գլխավոր զինվորական դատախազին, որոնցում նա խոսում է սպառազինության սուր անբավարարության, հսկայական կորուստների, իր ստորաբաժանումում ռոտացիայի և բուժօգնության բացակայության մասին, ինչպես նաև զինվորական ղեկավարության անփութության ու աչքակապության մասին։ 

Ավելի վաղ Մորոզովը գրառում է հրապարակել Ավդեևկայի գրավման մասին, որում գրել է, որ քաղաքի գրավումը ռուսական կողմին արժեցել է 16 հազար անդառնալի կորուստ և մոտ 300 միավոր շարքից դուրս եկած զրահամեքենա։

 Դրանից հետո մի քանի ռուս պրոպագանդիստներ քննադատությունների տարափ են տեղացել Մորոզովի վրա և պահանջել հեռացնել գրառումը։  Ինչպես պնդել է Մորոզովը, իր գրառումը հեռացնելու հրամանը տրվել է ռուս պաշտոնական պրոպագանդիստների՝ հեռուստահաղորդավար Վլադիմիր Սոլովյովի աշխատակիցների, Յուլյա Վիտյազևայի և Արմեն Գասպարյանի ճնշման ներքո, որոնք իրեն ենթարկել են հետապնդումների։ «Ովքեր վախեցնում են անձամբ գալ և ձգանը քաշել: Դե ինչ, ես դա կանեմ ինքս: Ինքս կկրակեմ ինձ, եթե ոչ ոք չհամարձակվի իր վրա վերցնել այդ չնչին գործը։ Իսկ ձեզ կտան տանկեր և կոպտերներ»,- գրել է Մորոզովը։