Որևէ կերպ չկար դրված հարց, որ ինձ պաշտոնանկ են անելու. Արթուր Վանեցյանը՝ ԱԱԾ պետի պաշտոնում Նիկոլ Փաշինյանի հետ աշխատել համաձայնելու մասին. տեսանյութ

«Ես, դեռևս, երբ նոր ձևավորվում էր ԱԺ 8-րդ գումարման ԱԺ-ն, հայտարարեցի, որ եթե իշխանությունը իրապես ցանկություն ունի պարզելու, բացահայտելու 44-օրյա պատերազմի սկսման, ընթացքի և արդյունքների վերաբերյալ տեղեկույթուններ, ապա իշխանությունն ունի լայն գործիքակազմ, իդեմս դատախազության, քննչական մարմինների, ԱԱԾ-ի, որոնք ունեն մի քանի անգամ ավել հնարավորություններ և լիազորություններ, գործը քննելու և մեղավորներին պատժելու»,-այդ մասին այսօր ԱԺ ճեպազրույցների ժամանակ ասաց «Պատիվ ունեմ» խմբակցության ղեկավար Արթուր Վանեցյանը։

Նա նշեց, որ քննիչ հանձնաժողովը, դա ընդդիմության գործիքն է, երբ ընդդիմությունը կարողանում է իրականացնել խորհրդարանական վերահսկողություն, իսկ երբ իշխանությունն է ձևավորում քննիչ հանձնաժողով և իշխանությանը առավոտից երեկո պաշտպանող անձը հանդիսանում է քննիչ հանձնաժողովի նախագահ, ապա Վանեցյանը կասկածի տակ է դնում այդ հանձնաժողովի անաչառությունը։
 
Պատասխանելով նաև հարցին, թե նա 1,5 տարի ինչպես է համաձայնվել, որպես ԱԱԾ տնօրեն աշխատել Նիկոլ Փաշինյանի հետ, իսկ հիմա տարբեր պիտակներ ու որակումներ է տալիս նրա մասին, Արթուր Վանեցյանն ասաց․
«Ես իմ հրաժարականի հայտարարության մեջ ամեն ինչ ասել եմ։ Այսօր գտնվում եմ ընդդիմադիր դաշտում։ Որևէ կերպ չկար դրված հարց, որ ինձ պաշտոնանակ են անելու»,-ասաց Արթուր Վանեցյանը։

Մանրամասները՝ տեսանյութում