Ադրբեջանը չի կարող հավակնել այն տարածքին, որի բնակչությունը չի ճանաչում ադրբեջանական ռեժիմի իրավազորությունը. Արցախի նախկին պատգամավոր

Արցախի նախկին պատգամավոր Վահրամ Աթանեսյանն իր ֆեյսբուքյան էջում գրել է

Կարդում եմ արցախցի պաշտոնյաներին, քաղաքական գործիչներին (երեւանյան մամուլում նրանց հարցազրույցները հորդում են առատության եղջյուրից)։ Ոչ ոք ուշադրություն չի դարձնում Բաքվի «հինգ սկզբունքների» ամենաէական ձեւակերպմանը՝ փոխադարձաբար ճանաչել միմյանց «քաղաքական ինքնիշխանությունը»։  Սա է մատնում Իլհամի անհանգստությունը։ Որովհետեւ Ադրբեջանը տարածքային ամբողջականության ճանաչման խնդիր չունի։ ՄԱԿ-ի անդամակցությունը դրա երաշխիքն է։ Բայց «քաղաքական ինքնիշխանության» հարցը դամոկլյան սրի պես կախված է այդ երկրի գլխին, որովհետեւ փոքրամասնությունների ինքնորոշման իրավունքը ՄԱԿ-ի Գլխավոր ասամբլեայի 1970թ․ «Միջազգային իրավունքի սկզբունքների մասին» Հռչակագրով գերակա է տարածքային ամբողջականության նկատմամբ։ Հայաստանը չի կարող ճանաչել Ադրբեջանի «քաղաքական իքնիշխանությունը»։ Ոչ էլ Ադրբեջանը՝ Հայաստանի։ Այդ հարցը լուծվում է միջազգային իրավունքով․ ամբողջական է այն իշխանությունը, որ ներկայացնում է տարածքի ամբողջ ժողովրդին։ Ադրբեջանը չի կարող հավակնել այն տարածքին, որի բնակչությունը չի ճանաչում ադրբեջանական ռեժիմի իրավազորությունը։ Սա է իրավիճակի «մեխը»։