Այս տարվա առաջին կիսամյակում Արցախում ծնվել է 792 երեխա

2022 թվականի առաջին կիսամյակում Արցախի Հանրապետության առողջապահության նախարարության բուժհաստատություններում ծնվել է 792 երեխա՝ 406 տղա, 386 աղջիկ:
 
Ստեփանակերտում ծնվել է 697 երեխա, ծնված երեխաների առավելագույն քանակ է գրանցվել Մարտակերտում՝ 66, այնուհետև՝ Մարտունիում՝ 29:
 
Հունվար-հունիս ժամանակահատվածում Արցախում արձանագրվել է զույգ երեխաների 4 ծնունդ:
 
Նախարարությունից տեղեկացնում են, որ 6 երեխա ծնվել է արտամարմնային բեղմնավորման ճանապարհով, որից՝ 3 տղա, 3 աղջիկ:
 
Արցախի Հանրապետությունից ՀՀ բուժհաստատություններում ծնվել է 15 երեխա՝ 8 տղա, 7 աղջիկ: Արդյունքում՝ Արցախում ընդհանուր ծնելիությունը առաջին կիսամյակում կազմել է 807 երեխա՝ 414 տղա, 393 աղջիկ:
 
2021 թվականի առաջին կիսամյակի ընթացքում Արցախի առողջապահության նախարարության բուժհաստատություններում ծնվել է 593 երեխա՝ 270 տղա, 323-աղջիկ, ինչը նշանակում է, որ ընթացիկ տարվա նույն ժամանակահատվածում ունենք ուրախալի փաստ այն առումով, որ ծնունդների թիվն աճել է գրեթե 200-ով, և նորածինների մեջ գերակշռում են ապագա զինվորները: