«Ադրբեջանը Հայաստանի վրա հարձակվելու պլաններ չունի». Ալիև

Ադրբեջանը Հայաստանի վրա «հարձակվելու պլաններ չունի», հայտարարել է այդ երկրի նախագահ Իլհամ Ալիևը Գերմանիայի տնտեսության արևելյան կոմիտեի պատվիրակության հետ հանդիպմանը։

«[Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ] Բորելը հայտարարել է, որ եթե Ադրբեջանը հարձակվի Հայաստանի վրա, ապա կտեսնի դրա դառը պտուղները: Նախ՝ որտեղի՞ց Բորելին տեղեկությունը, որ Ադրբեջանը պատրաստվում է հարձակվել Հայաստանի վրա։ Նման պլաններ չունենք», - «ԱզերԹաջ» պետական գործակալության փոխանցմամբ՝ հայտարարել է Իլհամ Ալիևը։

«Սրանք պարոն [Ֆրանսիայի նախագահ Էմանյուել] Մակրոնի հորինվածքներն են։ Այս ամենը Ֆրանսիայի հակաադրբեջանական քաղաքականության մաս է կազմում՝ հիմնված մեր երկրի դեմոնիզացիայի վրա կապված այն բանի հետ, թե իբր Ադրբեջանը պատրաստվում է հարձակվել Հայաստանի վրա»,- նշել է նա։


Աղբյուրը «Ազատություն» ռադիոկայանի