Պուտինը «ռացիոնալ խաղացող է», բայց սխալ հաշվարկ է արել Ուկրաինա ներխուժումից առաջ. Բայդեն

ԱՄՆ նախագահ Ջո Բայդենը նախօրեին բացառիկ հարցազրույց է տվել CNN հեռուստաընկերության լրագրող Ջեյք Թափերին։ Այս իրադարձությունն ինքնին բավականին ուշագրավ է, քանի որ ամերիկացի առաջնորդը հազվադեպ է հարցազրույցներ տալիս։

 Անցյալ շաբաթ Բայդենը հայտարարել է, որ «միջուկային արմագեդոնի» ռիսկը վերջին 60 տարվա ընթացքում ամենաբարձր մակարդակի է, իսկ հարցազրույցում ասել է, որ միջուկային զենք կիրառելու ռուսական սպառնալիքները կարող են հանգեցնել աղետալի հետևանքների։
Միաժամանակ, ինքը՝ Բայդենը, չի հավատում, որ ՌԴ նախագահ Վլադիմիր Պուտինը կորոշի միջուկային զենք կիրառել Ուկրաինայում։ «Ես չեմ կարծում, որ նա կանի դա: Ես կարծում եմ, որ նա անպատասխանատվությամբ է այդ մասին խոսում, աշխարհի ամենամեծ միջուկային տերություններից մեկի համաշխարհային առաջնորդն ասում է, որ կարող է մարտավարական միջուկային զենք կիրառել Ուկրաինայում», - ասել է Բայդենը:

Նա հրաժարվել է հայտնել, թե ինչպիսին կլինի ԱՄՆ-ի պատասխանը, եթե Պուտինը, համենայնդեպս, իրագործի սպառնալիքները: Նրա խոսքով՝ Պենտագոնը նախապես տարբեր տարբերակներ է մշակել նման սցենարի դեպքում։ «Դա քննարկվել է, բայց ես չեմ պատրաստվում դրան տրվել: Իմ կողմից անպատասխանատու կլինի ասել, թե ինչ ենք մենք անելու կամ ինչ չենք անելու»,- հավելել է նախագահը:

Բայդենը հարցազրույցի ժամանակ ասել է, որ Վլադիմիր Պուտինին համարում է ռացիոնալ քաղաքական գործիչ, որը լրջորեն սխալ է հաշվարկել Ուկրաինա ներխուժումը։ «Ես կարծում եմ, որ նա ռացիոնալ խաղացող է, որը շատ սխալ հաշվարկ է արել»,- հայտարարել է նա:

Բայդենը անհեթեթ է անվանել Պուտինի նպատակներն Ուկրաինայում: «Դուք լսեք, թե ինչ է նա ասում: Եթե դուք լսեք նրա ելույթը, որը նա արել է (ներխուժման մասին) որոշումն ընդունելուց հետո... նա խոսում էր այն մասին, որ պետք է լինի Ռուսաստանի առաջնորդը, որը կմիավորի բոլոր ռուսախոսներին։ Ես պարզապես դա համարում եմ իռացիոնալ»,- ասել է Բայդենը:

Բայդենի կարծիքով՝ Պուտինը սխալմամբ ենթադրել է, որ ուկրաինացիները կենթարկվեն ռուս զինվորականներին։ Դա մոլորություն էր, որն իրենք՝ ուկրաինացիները, ժխտեցին ռուսական ագրեսիային իրենց կատաղի դիմադրությամբ։

Անդրադառնալով Պուտինի հետ հանդիպման հնարավորությանը՝ Բայդենն ասել է. «Լսեք, ես նրա հետ հանդիպելու մտադրություն չունեմ։ Բայց, օրինակ, եթե նա ինձ մոտ գար G20-ի գագաթնաժողովին և ասեր, որ ցանկանում է խոսել (բասկետբոլիստ) Բրիթնի Գրայների ազատ արձակման մասին, ես կհանդիպեի նրա հետ։ Ամեն ինչ կախված է հանգամանքներից»: