«Մայիսի 28-ի քվեարկությունը կվերածենք «Թուրքիայի հարյուրամյակի» նախակարապետի». Էրդողանը վերսկսել է նախընտրական արշավը

Թուրքիայի գործող նախագահ Ռեջեփ Թայիփ Էրդողանն այսօր հայտարարել է, որ հաղթանակ է ակնկալում մայիսի 28-ին կայանալիք նախագահական ընտրությունների երկրորդ փուլում, և սկսել է նախապատրաստվել դրան։

«Մենք համառորեն պայքարեցինք (առաջին փուլում)՝  առանց սադրանքների, ուշադրություն չդարձնելով ճնշումներին, առանց հուսահատվելու, չհանձնվելով դժվարությունների առաջ: Մենք արդեն սկսել ենք նախապատրաստվել մայիսի 28-ին։ Հիմա ժամանակն է մայիսի 14-ին ձեռք բերած մեր հաջողությունը պսակել ավելի ամուր հաղթանակով»,- գրել է նա Թվիթերի իր էջում։
Թուրքիայի նախագահը նշել է, որ «երկրորդ փուլը տեղի կունենա մայիսի 28-ին՝ մայիսի 27-ի (1960 թ.) հեղաշրջման 63-րդ տարելիցի հաջորդ օրը»:

«Մենք դաշինք ենք («Հանրապետական դաշինք»՝ իշխող կուսակցության մասնակցությամբ), որն իր աշխատանքում առաջնահերթություն է համարել երկրին ու ազգին ծառայելու ազգային կամքն ու սերը։ Մենք կարող ենք մեր պարտքը տալ մեր ժողովրդին, որը մինչև այժմ պաշտպանել է մեզ և անհրաժեշտության դեպքում մարտահրավեր նետել տանկերին՝ շարունակելով ավելի ջերմեռանդորեն աշխատել»,- ասել է Էրդողանը: 

Քաղաքական գործիչը հաղորդել է, որ նախատեսվող չափազանց նշանակալի ընտրությունների օրերը կօգտագործվեն առավելագույնս լիարժեք և արդյունավետ։ Նա ընդգծել է, որ Թուրքիայի ժողովուրդն ընտրություններում հաղթողից ակնկալում է իրական աշխատանք և հայտարարված նպատակների իրագործում։ «Մենք մայիսի 28-ի քվեարկությունը կվերածենք «Թուրքիայի հարյուրամյակի» նախակարապետի։ Մենք վստահում ենք ձեզ»,- հավաստիացրել է Էրդողանը: 
 
Առաջին փուլում Թուրքիայի գործող նախագահը հավաքել է ընտրողների ձայների 49,51%-ը, ընդդիմության առաջնորդ Քեմալ Քըլըչդարօղլուն՝ 44,88%-ը։ «Աթա» քաղաքական դաշինքի ներկայացուցիչ Սինան Օգանը ստացել է ձայների 5,17 տոկոսը։ Առաջին փուլում հաղթելու համար թեկնածուն պետք է հավաքեր ձայների 50%-ից ավելին, երկրորդ փուլում հաղթանակ կապահովի պարզ մեծամասնությունը։