Այսօր կամ վաղը 17 հազար կենսաթոշակառուների հետ ենք վճարելու 44 մլն դրամ. Նիկոլ Փաշինյան

Հասարակություն

11:44, 24 август 2022

Այսօր՝ օգոստոսի 24-ին, Կառավարության հերթական նիստում կենսաթոշակների բարձրացման հարցը քննարկելիս վարչապետ Նիկոլ Փաշինյանն անդրադարձավ նաև կառավարության նախկինում կայացրած որոշմանը, որը դարձյալ կենսաթոշակների դեֆակտո բարձրացման հնարավորություն է տալիս. խոսքը անկանխիկ առևտրի դեպքում գումարի հետվճար իրականացնելու մասին է, ինչը գործում է հուլիսի 1-ից:

Վարչապետը նշեց, որ պետք է մի քիչ ավելի ակտիվ աշխատել բանկերի հետ շահառուների շրջանակն ավելի ընդլայնելու համար. «Կամ էլ նպաստենք, որ կենսաթոշակառուներն ավելի արագ դառնան այն բանկերի հաճախորդ, որոնք մասնակցում են այս ծրագրին»:

«Այժմ 173 հազար շահառուներից 17 հազար կենսաթոշակառու արդեն կոնկրետ սկսել է անկանխիկ գործարքները՝ նախկին 0-ի փոխարեն: Եվ այժմ մենք իրենց 44 մլն դրամ հետ ենք վճարում այսօր կամ վաղը»,- նշեց վարչապետը և ընդգծեց, որ այս փուլում ինչ-որ կերպ գնաճի ազդեցությունը զսպվում է՝ հույս հայտնելով, որ հաջորդ որոշումներով առաջանցիկ կլինեն:

Նիկոլ Փաշինյանը հիշեցրեց, որ 2021 թվականի խորհրդարանական ընտրություններում «Քաղաքացիական պայմանագիր» կուսակցության նախընտրական ծրագրում արձանագրված է, որ մինչև 2026 թվականը միջին կենսաթոշակը պետք է դարձվի 61 հազար դրամ. «Ամեն ինչ կանենք տեմպը հնարավորինս արագ պահելու համար»:

Մանրամասն՝ տեսանյութում: