Թումանյանի այգում սեպտեմբերին կիրականացվի «Օպերա բաց երկնքի տակ» նախագիծը, կլինեն նաև արտերկրից հրավիրված օպերային աստղեր

«Երևանի քաղաքապետարանի նախաձեռնությամբ Թումանյանի այգում սեպտեմբերի 12, 13, 14 և 15-ին կիրականացվի «Օպերա բաց երկնքի տակ» խորագիրը կրող նախագիծը։ Բեմական, տեխնիկական գործընթացների մոնտաժման աշխատանքներն ավարտված են և այսօր կկայանան օպերայի ներկայացումների փորձերը։ Երևանի բնակչության և քաղաքի հյուրերի համար բացօթյա ձևաչափով կցուցադրվեն ազգային օպերային թատրոնի երգացանկային ներկայացումները՝ Անուշ, Տրավիատա օպերաները, իսկ նախագիծը կեզրափակվի «Օպերա-գալա» մեծ ծրագրով՝ արտերկրից հրավիրված օպերային աստղերի մասնակցությամբ։ Գալա համերգը կկայանա սեպտեմբերի 15-ին ժամը 21։00-ին»։ Այս մասին հայտարարեցին այսօր՝ սեպտեմբերի 11-ին Երևանի քաղաքապետարանի գործակարգավարական խորհրդակցության ժամանակ։

Քաղաքապետի տեղակալ Տիգրան Ավինյանի խոսքով՝ այս տեսակ ներկայացումները պետք է քաղաքում դառնան ավանդույթ։