«Հաստատակամ ենք ՀՀ կառավարության հետ զարգացնելու հարաբերությունները». Իրանի դեսպանը՝ ՀՀ իշխանությունների բրյուսելյան հանդիպման մասին

Իրանի դեսպան Մեհդի Սոբհանին այսօր կայացած մամուլի ասուլիսում «օվկիանոսից այն կողմ» երկրների շարքում դասել է Միացյալ Նահանգներին և որոշ եվրոպական երկրների: 

Ինչ վերաբերում է բրյուսելյան հանդիպմանը և հարցին, թե ինչպես է հայ-իրանական հարաբերությունների վրա ազդում Հայաստանի մերձեցումը Արևմուտքի հետ, Իրանի դեսպանն ասաց. «Այս հարցի հետ կապված մենք Հայաստանի իշխանությունների հետ խոսել ենք: Հայաստանի իշխանությունները մեզ ասացին, որ այդ հանդիպումը ամբողջովին տնտեսական բնույթ է կրում, ինչպես նաև ԼՂ ժողովրդի համար աջակցություն ստանալու նպատակով է և ուղղված չէ որևիցե երրորդ երկրի դեմ: Բնականաբար, Հայաստանի ջանքերին՝ ուղղված տնտեսության ամրապնդմանը և ԼՂ ժողովրդի խնդիրների լուծմանը, մենք դեմ չենք: Դա Հայաստանի իրավունքն է՝ փնտրելու տնտեսական զարգացման և խնդիրները լուծելու ուղիներ»: 

Նա նշեց, որ իրենց մտահոգությունն այն է, որ Հայաստանը և Կովկասը չվերածվեն աշխարհաքաղաքական մրցակցության դաշտի, կամ ՀՀ արտաքին հարաբերությունների զարգացումը չլինի ի հաշիվ այլ երկրների. «ՀՀ իշխանությունները մեզ տեղեկացրել են, որ Հայաստանի արտաքին քաղաքականության դիվերսիֆիկացումը ՀՀ-Իրան հարաբերությունների դեմ չէ»:

Նրա խոսքով՝ Իրանը Հայաստանի հետ ունի լավ ստրատեգիական հարաբերություններ. «Եվ մենք հաստատակամ ենք ՀՀ կառավարության հետ հարաբերությունները զարգացնելու և կշարունակենք այդ ուղղությունը»: