Ընդամենը 53 ձայնով կարող էր այսքան ինտրիգային չմնալ այս միջավայրը. ԱԺ ձեր գործընկերներին հարցրեք՝ կասեն, թե ինչ էր ընտրակեղծիքը. Տիգրան Ավինյանը՝ Սամվել Հակոբյանին

«Պարոն Հակոբյան, երբ խոսում եք արատավոր երևույթներից և ընտրակեղծիքից, ես հիշում եմ ոչ այնքան հեռավոր 2017 թվականի ԱԺ ընտրությունները, 2017-ի ավագանու ընտրությունները: Եվ եթե դուք չգիտեք ընտրակեղծիքը որն է, ես կարող եմ իմ գործընկերներին խնդրել ցույց տալ փաստերով, թե ընտրակեղծիքը, կարուսելը ինչպիսիք են լինում, թե որն է ընտրակեղծիքը, և որ դեպքերում պետք է այդ բառը օգտագործեք»,- Երևանի քաղաքապետարանի ավագանու նիստում պատասխանելով «Մայր Հայաստան»-ի անդամ Սամվել Հակոբյանին՝ ասաց քաղաքապետ Տիգրան Ավինյանը:

Նա ընդգծեց. «Ընտրակեղծիքի մասին է խոսվում այն դեպքում, երբ հարյուր հազարավոր ձայների մեջ ընդամենը 53 ձայնով կարող էր այսքան ինտրիգային չմնալ այս միջավայրը: Ես ձեզ վստահեցնում եմ, որ ընտրակեղծիքը և մենք շատ-շատ տարբեր բևեռներում ենք գտնվում: Եթե ուզում եք ընտրակեղծիքի մասին ինչ-որ բան իմանալ, ես ձեզ խորհուրդ կտամ ԱԺ ձեր գործընկերներից հարցնել, թե դա ինչպես է կազմակերպվում, ինչ մեխանիզմներ են օգտագործվում, ինչքան փող է դրվում դրա համար, հարյուրապետները, հազարապետները ինչ մեխանիզմով պետք է գործեին, ում ինչքան փող պետք է բաժանեին, կարուսելը ինչպես էր կազմակերպվում և այդպես շարունակ: Եվ 2018 թվականին, պարոն Հակոբյան, այ էդ տեսակի վերջը եկել է, և ընտրակեղծիք, որպես այդպիսին, գոյություն չունի»: