«Մեր պատմության մեջ ոչ մի այլ նախագահ չի խոնարհվել ռուս բռնապետ Պուտինի առաջ». Բայդենը՝ Թրամփի մասին

ԱՄՆ նախագահ Ջո Բայդենը «անուղեղ» և «ամոթալի» է անվանել նախագահի ընտրություններում իր պոտենցիալ մրցակից Դոնալդ Թրամփի հայտարարությունն այն մասին, որ նա չի ցանկանում պաշտպանել ՆԱՏՕ-ի այն դաշնակիցներին, որոնք, ըստ Թրամփի, շատ քիչ են ծախսում պաշտպանության վրա։ Ամերիկյան վարչակազմի ղեկավարի հայտարարությունները մեջբերում է BBC-ն։

Ջո Բայդենը մամուլի համար իր հայտարարության մի մասը նվիրել է Թրամփի արտահայտություններին, որի հիմնական թեման Ուկրաինային և մյուս դաշնակիցներին բազմամիլիարդանոց ռազմական օգնության մասին օրենքն էր և Կոնգրեսի միջոցով դրա անցկացումը։

«Թրամփը (նախագահ Վլադիմիր) Պուտինին հրավիրել է ներխուժել ՆԱՏՕ-ի մեր որոշ դաշնակիցների երկրներ։ Նա ասել է, որ եթե դաշնակիցը բավարար գումար չի ծախսի պաշտպանության վրա, ինքը կխրախուսի Ռուսաստանին, մեջբերում եմ, «անելու այն, ինչ նրանք, գրողը տանի, ուզում են»: ...Մեր պատմության մեջ ոչ մի այլ նախագահ չի խոնարհվել ռուս բռնապետի առաջ»,- ասել է Բայդենը և խոստացել, որ ինքը նույնպես երբեք չի անի դա։