«Մենք չենք ընդունում նման տոնայնությունը ՌԴ-ի, մեր նախագահի նկատմամբ». Պեսկովը՝ Պուտինին ՀԱՄԱՍ-ի հետ համեմատելու Բայդենի հայտարարության մասին

ՌԴ նախագահի մամուլի քարտուղար Դմիտրի Պեսկովը մեկնաբանել է ԱՄՆ նախագահ Ջո Բայդենի հայտարարությունը Վլադիմիր Պուտինի մասին, որում նա համեմատական է անցկացրել Ռուսաստանի նախագահի և ՀԱՄԱՍ-ի միջև։ Լրագրողների համար ճեպազրույցում Պեսկովը հայտարարել է, որ Կրեմլը «չի ընդունում նման տոնայնությունը» ՌԴ նախագահի նկատմամբ, փոխանցում է ռադիո «Մայակ»-ը։

Պեսկովին հարցրել են, թե ինչպես է Կրեմլը վերաբերվում ԱՄՆ նախագահի խոսքերին, որը «փորձել է զուգահեռներ անցկացնել» ՀԱՄԱՍ-ի և Պուտինի միջև։ Կրեմլի ներկայացուցիչը նշել է, որ այժմ «շատ հուզական և պոտենցիալ վտանգավոր պահ է միջազգային իրավիճակում»։

«Տարբեր քաղաքական գործիչների, այդ թվում՝ բարձրաստիճան քաղաքական գործիչների և պետական  գործիչների ելույթներում շատ են էմոցիաները։ Բայց նման հռետորաբանությունը հազիվ թե համապատասխանում է պետությունների պատասխանատու առաջնորդներին, և հազիվ թե նման հռետորաբանությունը կարող է ընդունելի լինել մեզ համար։ Մենք չենք ընդունում նման տոնայնությունը Ռուսաստանի Դաշնության, մեր նախագահի նկատմամբ»,- ասել է Կրեմլի ներկայացուցիչը։

Նա հավելել է, որ Բայդենի խոսքերը ենթադրում են, որ Միացյալ Նահանգները «կշարունակի փորձել ճնշում գործադրել և զսպել Ռուսաստանի Դաշնությանը»։

«Մենք դա վաղուց գիտեինք, դա գաղտնիք չէր։ Բայց միևնույն ժամանակ պարոն Բայդենը ոչ մի խոսք չասաց այն մասին, որ մինչ այժմ Ռուսաստանին զսպելու այդ բոլոր ջանքերը շատ-շատ  քիչ արդյունավետ են եղել։ Դրանք քիչ անարդյունավետ կլինեն նաև ապագայում»,- հավելել է ՌԴ նախագահի մամուլի քարտուղարը։