Գերմանիան կշարունակի դաշնակիցների հետ համակարգել Ուկրաինային ռազմական աջակցության ցուցաբերումը. Շոլց

Գերմանիայի կանցլեր Օլաֆ Շոլցը հայտարարել է, որ Գերմանիան կշարունակի ռազմական աջակցություն ցուցաբերել Ուկրաինայի իշխանություններին, բայց դա կանի կշռադատված և դաշնակիցների հետ համակարգմամբ:

«Մենք Ուկրաինան զինել ենք զենքով՝ տանկերով, հակաօդային պաշտպանության հրթիռներով, ռազմամթերքով և այլն։ Եվ մենք կշարունակենք աջակցել Ուկրաինային։ Մենք դա անում ենք մեր բոլոր ընկերների հետ սերտ համագործակցությամբ, սերտ համաձայնեցմամբ»,- ասել է Շոլցը։

Նա ընդգծել է, որ Գերմանիայի կողմից միակողմանի քայլեր չեն լինի, այլ կլինեն համատեղ և մանրակրկիտ կշռադատված գործողություններ:

Ավելի վաղ Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը կազմակերպության անդամ երկրներին կոչ էր արել որքան հնարավոր է շուտ Ուկրաինա ուղարկել վերջինիս անհրաժեշտ սպառազինությունը: