«Ադրբեջանը Ռուսաստանի մեծ հարևանն է, բարեկամը, գործընկերն ու դաշնակիցը». Պեսկով

Ռուսաստանի և Ադրբեջանի նախագահներ Վլադիմիր Պուտինը և Իլհամ Ալիևը Կրեմլում կքննարկեն երկու երկրների հարաբերությունները, նրանց հանդիպումը կշարունակվի աշխատանքային նախաճաշի ժամանակ։ Այս մասին ճեպազրույցում ասել է ՌԴ նախագահի մամուլի քարտուղար Դմիտրի Պեսկովը։ «Կրեմլում երկու պետությունների ղեկավարների միջև զրույց կկայանա»,- Պուտինի ժամանակացույցի մասին ասել է ՌԴ նախագահի մամուլի քարտուղարը։ Այդ խոսակցությունը, հավելել է Պեսկովը, «կշարունակվի աշխատանքային նախաճաշի ժամանակ»։

ՌԴ նախագահի մամուլի քարտուղարը նշել է, որ երկու երկրների ղեկավարները «առանձին հանդիպում կանցկացնեն Բայկալ-Ամուրյան մայրուղու վետերանների, շինարարների և աշխատողների հետ»։

«Հայտնի է, որ հայրը (Ադրբեջանի ներկայիս նախագահի) անմիջականորեն ղեկավարել է այդ կառույցն այն ժամանակ ԽՍՀՄ Նախարարների խորհրդում»։ «Իհարկե, սա առանձնահատուկ նշանակություն ունի՝ սա (ԲԱՄ-ի կառուցման) 50-ամյակն է, այդ թվում՝ մեր երկկողմ հարաբերությունների համար»։

Կրեմլի ներկայացուցիչն ընդգծել է. «Ադրբեջանը մեր լավ առևտրատնտեսական գործընկերն է, որն ունի մեծ պաշարներ <...> փոխգործակցության ողջ պոտենցիալն ընդլայնելու համար։ Ադրբեջանը Ռուսաստանի մեծ հարևանն է, բարեկամը, գործընկերն ու դաշնակիցը: Երկրներն ունեն համագործակցությունը զարգացնելու մեծ ներուժ և հարաբերությունների զարգացումը շարունակելու քաղաքական կամք»,- հավելել է Պեսկովը՝ ընդգծելով, որ Մոսկվան Բաքվի երրորդ կարևորագույն առևտրային գործընկերն է՝ Իտալիայից և Թուրքիայից հետո։