Թինա Կանդելակիի մուտքը Ղազախստան արգելվել է

Ղազախստանի ԱԳՆ ներկայացուցիչ Այբեկ Սմադիյարովը հայտնել է, որ TNT հեռուստաալիքի տնօրեն Թինա Կանդելակիին արգելվելու է մուտք գործել երկիր։ Այս մասին հայտնում է КазТАГ գործակալությունը։
 
«Անհրաժեշտության դեպքում միջոցներ են ձեռնարկվում։ Մեզնից մի պահանջեք դա (մուտքն արգելվածների ցուցակը) այսօր կամ վաղը, բայց պետությունը դա երբեք չի ների։ Հնարավոր է, նա չէր էլ պատրաստվում գալ Ղազախստան, բայց եթե որոշի գալ, նրան թույլ չեն տա»,- մեջբերում է գործակալությունը դիվանագետի հայտարարությունը։ 

Ինչպես նշում է КазТАГ-ը, այս որոշման վրա կարող էր ազդել հեռուստահաղորդավարուհու՝ իր Telegram ալիքում արված գրառումը Ղազախստանում ռուսաց լեզուն դուրս մղելու մասին։ Իր հաղորդագրության մեջ Կանդելակին համեմատել է մի քանի երկաթուղային կայարաններ վերանվանելու հանրապետության իշխանությունների որոշումը Բալթյան երկրներում ռուսաց լեզվի արգելքի հետ։