«Հայաստանը մեզ համար ավելի քան եղբայրական է՝ չնայած հիմա հարաբերությունների բարդ փուլ ենք ապրում». Պեսկով

ՌԴ նախագահի մամուլի քարտուղար Դմիտրի Պեսկովը հույս է հայտնել, որ Երևանի իշխանությունները կցուցաբերեն անհրաժեշտ քաղաքական վճռականություն Ռուսաստանի հետ հարաբերությունները հետագայում ամրապնդելու համար՝ չնայած երկկողմ հարաբերություններում առկա դժվարություններին։ Այս մասին նա հայտարարել է «Արգումենտի ի ֆակտի»-ին տված հարցազրույցում։ «Հուսով ենք, որ Երևանում կիշխի քաղաքական կամք՝ շարունակելու մեր հարաբերությունների զարգացումը, և մենք հաջողությամբ կանցնենք այս բարդ փուլը»,- ասել է նա։

Պեսկովը նաև ընդգծել է, որ չնայած երկկողմ հարաբերությունների բարդ փուլին, Ռուսաստանի Դաշնությունում բնակվող հայերի տնտեսական ներդրումը Հայաստանի տնտեսության մեջ մնում է զգալի՝ տարեկան կազմելով մի քանի միլիարդ դոլար։ «Հիմա մենք բավականին ոչ հասարակ փուլ ենք ապրում մեր բարեկամ, եղբայրական Հայաստանի հետ հարաբերություններում: Այն նույնիսկ ավելի քան եղբայրական է, որովհետև այստեղ նույնիսկ ավելի շատ հայեր են ապրում, քան բուն Հայաստանում»,- կրկնել է Պեսկովը ավելի վաղ հնչեցրած իր տվյալները։

Անդրադառնալով արտատարածաշրջանային ուժերի կողմից «կովկասյան տարածաշրջանի» նկատմամբ ուշադրությանը՝ Պեսկովը կարծիք է հայտնել, որ նրանց ներկայությունը պետք է սահմանափակվի, քանի որ դա չի նպաստում կայունությանն ու բարգավաճմանը։