Ռուսաստանը մնում է առանց փողի. Ինչ հետևանքներ են ունենում ԱՄՆ և ԵՄ պատժամիջոցները

Ռուսական նավթային ընկերությունները բախվում են հումքի և վառելիքի վճարումների մինչև մի քանի ամսով հետաձգման, քանի որ Չինաստանի, Թուրքիայի և Արաբական Միացյալ Էմիրությունների (ԱՄԷ) բանկերն ավելի զգուշավոր են դառնում ԱՄՆ կրկնակի պատժամիջոցներից: Այս մասին հայտնում է Reuters-ը։ Ինչպես նշում է գործակալությունը, վճարումների ուշացումները կրճատում են Կրեմլի եկամուտները և դարձնում դրանք անկայուն՝ թույլ տալով Վաշինգտոնին հասնել պատժամիջոցների կրկնակի նպատակին՝ խափանել փողի հոսքը Կրեմլ, որպեսզի պատժի նրան Ուկրաինայի դեմ պատերազմի համար՝ միաժամանակ առանց ընդհատելու գլոբալ էներգետիկ հոսքերը։

Ութ բանկային և առևտրային աղբյուրների տեղեկություններով՝ վերջին շաբաթներին Չինաստանի, ԱՄԷ-ի և Թուրքիայի մի քանի բանկեր խստացրել են պատժամիջոցներին հետևելու իրենց պահանջները, ինչը հանգեցրել է Մոսկվա դրամական փոխանցումների հետաձգման կամ նույնիսկ մերժման: Կրեմլի ներկայացուցիչ Դմիտրի Պեսկովը հայտարարել էր, որ գոյություն ունեն վճարումների հետ կապված խնդիրներ՝ ի պատասխան հարցի այն լուրերի վերաբերյալ, որ Չինաստանում բանկերը դանդաղեցրել են վճարումները:

«Իհարկե, ԱՄՆ-ի և Եվրամիության աննախադեպ ճնշումը Չինաստանի Ժողովրդական Հանրապետության վրա շարունակվում է: Դա, իհարկե, որոշակի խնդիրներ է ստեղծում, բայց չի կարող խոչընդոտ դառնալ մեր (Չինաստանի հետ) առևտրատնտեսական հարաբերությունների հետագա զարգացմանը»,- ասել էր Պեսկովը։