Բանկային հաշիվների կենտրոնացված ռեեստրի ներդրումն արդյունավետ կլինի նաև փողերի լվացման դեմ պայքարի հարցում․ Արկադի Խաչատրյան
Հայաստան
Այսօր՝ ապրիլի 6-ին, ՀՀ ԱԺ ֆինանսավարկային և բյուջետային հարցերի մշտական հանձնաժողովի նիստում քննարկվում է բանկային հաշիվների կենտրոնացված ռեեստրի ներդրման հարցը։
Առաջարկվում է նաև Կենտրոնական բանկի խորհրդի լիազորություններին՝ սահմանել ռեեստրի վարման կարգը, ներդրման ենթակա տեղեկությունների նույնականացման ցանկը՝ այդ թվում հաշվետվությունների տեսքով տրամադրելու կարգն ու ժամկետները։
Հանձնաժողովի նախագահ Արկադի Խաչատրյանի խոսքով՝ այս փոփոխությունը բխում է նաև փողերի լվացման և ահաբեկչության ֆինանսավորման դեմ պայքարի հետ կապված ընթացակարգերի բարելավման անհրաժեշտությունից։ Բացի այդ կենտրոնացված ռեեստրը թույլ է տալու զարգացնել նորարարական գաղափարներ՝ կապված քաղաքացիների հաշիվների ավտոմատացման, հետագայում նաև թվային արժույթի ներդրման հարցերում, ինչպես նաև այս ռեեստրը թույլ է տալու նույնականացնել քաղաքացիների հաշիվները միջազգային փոխանցումների ժամանակ։
«Ռեեստրը կենտրոնացված տվյալների բազա է հաշիվների վերաբերյալ։ Փողերի լվացման և ահաբեկչության ֆինանսավորման ընթացակարգերի բարելավումը կայանում է նրանում, որ իրավապահ համակարգի համագործակցության ժամանակ կասկածի կամ գործողության առարկա չդառնան բոլոր հաշիվները կամ բոլոր բանկերը, այլ այդ ռեեստրի միջոցով այն հաշիվները հավաքագրվեն, որոնք խնդրո առարկա են»,-ներկայացրեց Արկադի Խաչատրյանը։