Լաչինի միջանցքում իրավիճակը բարդացնում է Բաքվի և Երևանի միջև խաղաղության բանակցությունները․ Գալուզին

Լաչինի միջանցքի շուրջ սրացումը բարդացնում է Հայաստանի և Ադրբեջանի միջև խաղաղության պայմանագրի կնքման աշխատանքները, այսօր ՏԱՍՍ-ին տված հարցազրույցում ասել է Ռուսաստանի փոխարտգործնախարար Միխայիլ Գալուզինը։

«Անկասկած, Լաչինի միջանցքի շուրջ ներկայիս սրացման միջադեպերը չեն կարող չբարդացնել բանակցությունների ֆոնը, այդ թվում՝ խաղաղության պայմանագրի շուրջ», - ասել է փոխարտգործնախարարը՝ նշելով, որ ռուսական կողմը եռանդուն ջանքեր է գործադրում տեղում իրավիճակը կարգավորելու համար:

«Մենք ակնկալում ենք հայ-ադրբեջանական հարաբերությունների կարգավորման բոլոր ուղղություններով համատեղ աշխատանքի շուտափույթ վերսկսում», - ասել է Գալուզինը՝ շարունակելով․ - «Մենք կարծում ենք, որ այս դեպքում փաստաթղթի շուրջ համաձայնության ժամկետն այնքան էլ կարևոր չէ: Գլխավորն այն է, որ Բաքուն և Երևանը կարողանան հասնել փոխադարձ ընդունելի լուծման, որը կերաշխավորի կայուն և արդար խաղաղություն տարածաշրջանում»։

Դիվանագետի խոսքով՝ ռուսական կողմը պատրաստ է աջակցել բանակցային գործընթացին՝ հոկտեմբերի 31-ին Սոչիում Ռուսաստանի, Ադրբեջանի և Հայաստանի ղեկավարների եռակողմ հայտարարության համաձայն։