ԱՄՆ-ը պատրաստվում է մեծ պատերազմի. Politico

ԱՄՆ նախագահ Ջո Բայդենի վարչակազմը միջոցներ է մշակում արձագանքելու համար, եթե մերձավորարևելյան հակամարտությունն ընդլայնվի և տարածվի ամբողջ մերձավորարևելյան տարածաշրջանում, գրում է Politico-ն՝ հղում անելով իրազեկ աղբյուրներին։

Նրանց խոսքով՝ հակամարտության ընդլայնման հավանականությունն աճում է Իրաքում, Լիբանանում և Իրանում վերջին օրերին տեղի ունեցած ռազմական բախումների հետևանքով։ Դա, ինչպես հայտարարում են աղբյուրները, վստահեցրել է ամերիկյան վարչակազմի ներկայացուցիչներին, որ հակամարտությունը պաշտոնապես տարածվել է Գազայի հատվածի սահմաններից շատ հեռու, այսինքն՝ իրադարձությունների զարգացում, որից ԱՄՆ-ն ամիսներ շարունակ փորձում էր խուսափել: 

Politico-ի զրուցակիցներն ասել են, որ ԱՄՆ զինվորականները ներկայումս մշակում են Եմենի հուսիթների դեմ պատասխան հարված հասցնելու ծրագիր, որոնք բազմիցս հարձակվել են Կարմիր ծովում առևտրական նավերի վրա: Հետախուզության ներկայացուցիչները, իրենց հերթին, փորձում են կանխատեսել և կանխարգելել Իրաքում և Սիրիայում ԱՄՆ ուժերի վրա հնարավոր հետագա գրոհները, ինչպես նաև պարզել հուսիթների հաջորդ հարձակումների հնարավոր օբյեկտները:
 
Աղբյուրները նաև հայտնել են, որ ԱՄՆ-ը ամիսներ շարունակ կուլիսների հետևում Թեհրանին կոչ էր անում համոզել իր պրոքսիներին դադարեցնել հարձակումները, սակայն նշաններ առ այն, որ հուսիթները կհրաժարվեն իրենց հարձակումներից, առայժմ նկատելի չեն:
Politico-ն ընդգծում է, որ մերձավորարևելյան հակամարտության աճը սպառնում է ոչ միայն տարածաշրջանային անվտանգությանը, այլև նախագահ Բայդենի վերընտրվելու հնարավորություններին։ Պարբերականը նշում է, որ 2024 թվականին ընտրողները կարող են իրենց կարծիքը հայտնել այս ընտրություններում արտաքին քաղաքականության առանցքային հարցի վերաբերյալ՝ Ամերիկան որքանով պետք է ներգրավված լինի արտասահմանյան հակամարտությունների մեջ։