Իրանը հայտարարում է Պարսից ծոցում օտարերկրյա նավ առգրավելու մասին

Իրանի Իսլամական հեղափոխության պահապանների կորպուսը հայտարարել է, որ Պարսից ծոցի ջրերում առգրավել են օտարերկրյա նավ, որը բեռնված է եղել, ինչպես պնդում են, մաքսանենգ դիզելային վառելիքով, փոխանցում է կառավարական IRNA գործակալությունը:

Նավի անձնակազմի յոթ անդամները կալանավորվել են, հայտնում է IRNA-ն՝ վկայակոչելով պաշտոնական աղբյուրները։

Հստակ չէ, թե երբ է առգրավվել նավը, որ երկրին է այն պատկանում, պարզ չէ նաև անձնակազմի ազգութային պատկանելությունը։

Պետական սուբսիդիաների և ազգային արժույթի անկման պատճառով Իրանի վառելիքի գինը համարվում է աշխարհի ամենաէժաններից։ Անցյալ շաբաթ պաշտոնական Թեհրանը հայտարարեց ավելի քան 220 հազար լիտր մաքսանենգ վառելիք տեղափոխող օտարերկրյա նավի առգրավման և անձնակազմի 11 անդամների ձերբակալության մասին, այդ միջադեպի առնչությամբ ևս Իրանի իշխանությունները մանրամասներ չեն հայտնել։

Աղբյուր՝ azatutyun.am