Բնակարաններ վարձակալության տալու համար պարտադիր պայման կլինի պայմանագիր կնքելն ու եկամտահարկ վճարելը

Բնակարաններ վարձակալության տալու համար պարտադիր պայման կլինի պայմանագիր կնքելն ու այն Կադաստրի կոմիտեում գրանցելը։ Կառավարության հավանությանն արժանացած՝ «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» ՀՀ օրենքի նախագիծն արդեն իսկ ուղարկվել է Ազգային ժողով։ 

Նախատեսվում է օրենքը կիրառել Հոկտեմբերի 1-ից, այսինքն՝ այդ ժամանակահատվածից սկսած բնակարանի վարձատուն պետք է վճարի եկամտահարկ։  

ՊԵԿ-ն այս նախագծում ընդգծել է, որ օրենքն ուժի մեջ մտնելուց հետո կնվազի գույքի վարձակալության ոլորտում առկա ստվերը, քանի որ վարձակալության պայմանագիրը պետական գրանցում կստանա և դուրս չի մնա հարկային դաշտից։ Նախագծով եկամտահարկի վճարումից խուսափելու համար տույժ է սահմանված: «Ձեռնարկատիրական գործունեություն համարվելու դեպքում համապատասխանաբար՝ վարձատուից գանձվում է տուգանք անշարժ գույքի՝ օրենքով սահմանված կարգով գնահատված՝ շուկայական արժեքին մոտարկված կադաստրային արժեքի 5 տոկոսի չափով, բայց ոչ ավելի, քան 500 հազար դրամը: Խախտումն արձանագրելուց հետո մեկ տարվա ընթացքում կրկին կատարելու դեպքում գանձվում է տուգանք անշարժ գույքի՝ օրենքով սահմանված կարգով գնահատված՝ շուկայական արժեքին մոտարկված կադաստրային արժեքի 10 տոկոսի չափով, բայց ոչ ավելի, քան մեկ միլիոն դրամը»,- գրված է նախագծում։

Առաջարկվում է նաև որոշ դեպքերում վարձատուին ազատել պատասխանատվությունից, մասնավորապես, երբ հարկ վճարողը անշարժ գույքի վարձակալությունից ստացվող եկամուտներից oրենսգրքով սահմանված կարգով հաշվարկել է եկամտային հարկը։ Այս կետը վերաբերում է այն դեպքերին, երբ ՊԵԿ-ի օպերատիվ հետախուզական միջոցառումն իրականացվում է այն ավարտված հաշվետու ժամանակաշրջանների մասով, որոնց գծով լրացել է նաև հարկային հաշվարկի ներկայացման վերջնաժամկետը. «Պատասխանատվությունը չի կիրառվի նաև այն դեպքում, երբ առանց վարձակալության գործարքից ծագող իրավունքների պետական գրանցման անշարժ գույքը վարձակալության հանձնվել և այդ հարկային տարվա ընթացքում անշարժ գույքի հետ կապված եկամտի ստացման իրավունքի վերաբերյալ հարկային մարմին է ներկայացվել հայտարարություն (վերաբերում է այն դեպքերին, երբ օպերատիվ հետախուզական միջոցառման իրականացման հարկային տարվա ընթացքում փաստացի վարձակալությունը առկա է)»,- մեջբերված է նախագծում: