Աղվան Հովսեփյանը կմնա կալանքի տակ

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, այսօր քննարկվում է ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի խափանման միջոցի հարցը։

Դատարանը որոշեց խափանման միջոց՝ կալանքը թողնել անփոփոխ:

«Պաշտպանության կողմի միջնորդությունը՝ այլ խափանման միջոցների, այդ թվում ստորագրություն չհեռանալու մասին և 50 միլիոն դրամ գրավի կիրառմաբ Աղվան Հովսեփյանին ազատ արձակելու միջնորդությունը մերժել՝ անհիմն լինելու պատճառով»,-ասաց դատավորը:

Աղվան Հովսեփյանի պաշտպան Երեմ Սարգսյանը լրագրողների հետ ճեպազրույցում ասաց, որ Մնացական Մարտիրոսյանը մնաց Մնացական Մարտիրոսյան, ինչպես բոլոր գործերում է տեղի ունենում:

«Հասկանում եմ՝ իրեն կպատժեին, եթե Աղվան Հովսեփյանին ազատ արձակեր: Եթե մի դատավոր մտածում է՝ չպատժվելու համար ինչ-որ մեկին ապօրինի կալանքի տակ պահի, այստեղ լուրջ խնդիր կա: Այսօր մենք կրկին գործ ունեցանք չարդարադատության հետ, ինչն իրականացրեց Մնացական Մարտիրոսյանը»,-ասաց պաշտպանը:

Երեմ Սարգսյանն ասաց, որ Վերաքննիչ քրեական դատարան բողոք կներկայացնեն, չնայած՝ այնտեղից էլ մեծ հույսեր չունեն:

«Մեր նպատակն է ներպետական ատյաններում հասնել արդարության, եթե չստացվի կդիմենք Եվրոպական դատարան, այս աղաղակող ապօրինությունների մասով»,-ասաց նա:

Հիշեցնենք, որ ըստ Հատուկ քննչական ծառայության տարածած հաղորդագրության` քրեական գործով ձեռք բերված բավարար ապացույցների համակցությամբ հիմնավորվել է, որ Աղվան Հովսեփյանը, 2004 թվականի մարտի 18-ից մինչև 2013 թվականի սեպտեմբերի 13-ը զբաղեցնելով գլխավոր դատախազի, իսկ 2014 թվականի հուլիսի 18-ից մինչև 2018 թվականի հունիսի 11-ը՝ քննչական կոմիտեի նախագահի պաշտոնները, հիշյալ ժամանակահատվածում փաստացի մասնակցել է ձեռնարկատիրական գործունեություն իրականացնող մի շարք ՍՊ ընկերությունների կառավարմանը, բացի այդ ստացել է առանձնապես խոշոր չափերով` 190 միլիոն ՀՀ դրամ կաշառք և խարդախության եղանակով կատարել առանձնապես խոշոր չափերով` 800 միլիոն ՀՀ դրամ գույքի հափշտակություն:

Հովսեփյանին մեղադրանք է առաջադրվել նաև հանցավոր ճանապարհով ստացված առանձնապես խոշոր չափերով` ընդհանուր 1.299.404.414 ՀՀ դրամ գույքը (փողերի լվացում) օրինականացնելու հոդվածով: Աղվան Հովսեփյանը կալանավորվել էր 2021 թվականի սեպտեմբերի 8-ին: