Սույն տիկնոջ և գործը քննած այլ դատավորների ապօրինի դատական ակտերի պատճառով ՀՀ-ն իր պետական բյուջեից պետք է մոտ 11 մլն դրամ վճարի․ Լուսինե Հակոբյան

Քաղաքականություն

14:54, 18 май 2021

Փաստաբան Լուսինե Հակոբյանը ֆեյսբուքյան իր էջում գրել է․

«Մինչ սույն տիկինը (դատավոր Կարինե Պետրոսյան) ստորև պաթետիկ գրառմամբ քաղաքական հայտ է ներկայացնում` հայտարարելով, որ միանում է Արթուր Վանեցյանի քաղաքական թիմին` շարունակելու իր նոր «պայքարը« «դատական համակարգի անկախությունը վտանգող գործընթացների դեմ», Մարդու իրավունքների եվրոպական դատարանն այսօր հրապարակել է իր վճիռը «Դարեսկիզբ» ՍՊԸ-ն (Հայկական ժամանակ օրաթերթ) ընդդեմ Հայաստանի գործով` ճանաչելով լրատվամիջոցը ներկայացնող ընկերության ՄԻԵԿ-ի 10-րդ հոդվածով երաշխավորված արտահայտվելու ազատության իրավունքի խախտում:

Գործով առաջին ատյանի դատավորը սույն տիկինն էր, որը լրատվամիջոցին երեք հայտնի օլիգարխների (Նեմեց Ռուբո, Լֆիկ Սամո, Ալրաղացի Լյովիկ) ներկայացրած հայցով պարտավորեցրել էր վճարել 6 000 000 դրամից ավելի բարոյական վնասի փոխհատուցում: Այժմ սույն տիկնոջ և հաջորդ ատյաններում գործը քննած դատավորների ապօրինի դատական ակտերի պատճառով Հայաստանի Հանրապետությունը իր պետական բյուջեից պետք է վճարի մոտ 11 295 000 ՀՀ դրամ որպես ընկերության նյութական ու բարոյական վնասի, ինչպես նաև դատական ծախսերի փոխհատուցում: Ուրախ եմ, որ Վահե Գրիգորյանի և EHRAC-ի փայլուն թիմի հետ իմ համեստ ջանքը Հայաստանի Հանրապետությունում արտահայտվելու ազատության իրավունքի պաշտպանության ուղղությամբ այս արդյունքն ունեցավ»,-նշել է նա:

Հիշեցնենք, որ ԲԴԽ-ի մայիսի 13-ի որոշմամբ դադարեցվել էր Կարինե Պետրոսյանի լիազորությունները՝ դատավորի պաշտոնում։ Նա հայտնել էր, որ իր գործունեությունը շարունակելու է Հայաստանի Հանրապետության անվտանգության և ապագայի համար մտահոգ «Հայրենիք» կուսակցության շարքերում