«Կրոկուս Սիթի Հոլլ»-ը մեր տունն է. դրա սեփականատերը «շատ տուժող կողմ է». Ալիևի նախկին փեսա

«Կրոկուս Սիթի Հոլլ»-ում տեղադրված հրդեհաշիջման համակարգը նորմալ աշխատել է ահաբեկչության ժամանակ, «Ռոսիա 24» հեռուստաալիքին հայտնել է «Կրոկուս Սիթի Հոլլ»-ի սեփականատեր Արազ Աղալարովի որդին՝ Էմին Աղալարովը։ «Դահլիճում միանշանակ աշխատել է ծխահեռացման համակարգը։ Կադրերում տեսնում ենք, որ երբ հրկիզումն արդեն տեղի է ունեցել, դահլիճը մառախուղի մեջ չի եղել, այսինքն՝ տեսանելիությունը պահպանվել է։ Մեր տանիքում հսկա ագրեգատ է կանգնած»,- Աղալարով կրտսերի խոսքերը մեջբերում է ՏԱՍՍ-ը։

Աղալարովը նաև վստահեցրել է, որ համերգասրահի բոլոր էվակուացիոն ելքերը բաց են եղել։ Այնուամենայնիվ, մարդիկ, փորձելով փրկվել, հանդիպել են անձնակազմի կողպված դռներին, ասել է նա: Համերգասրահի անվտանգությունը, ընդգծել է նա, նույնպես նորմալ է աշխատել։ «Կատարվածի լույսի ներքո սա հավանաբար օրենսդրության վերանայման կարիք ունի: Բայց մենք գործել ենք այն բազայի շրջանակներում, ինչ ունեինք այդ պահին»,- ասել է նա։ Ահաբեկչությունից անմիջապես հետո «Կրոկուս Ինտերնեշնլը» հայտարարել է, որ հրդեհից ոչնչացված համերգասրահը կվերականգնվի։ Սակայն Աղալարովն ասել է, որ դրա վերաբերյալ վերջնական որոշում դեռ կայացված չէ։ «Կարծում եմ՝ մենք միակը չենք, որ իրավունք ունի որոշում կայացնելու։ Կարծում եմ, որ մենք առաջնորդվում ենք նահանգապետի, իշխանությունների, գուցե պարոն նախագահի կարծիքով և ժողովրդի ընդհանուր կարծիքով»,- ասել է նա:

Աղալարով կրտսերը հաստատել է ավելի վաղ տարածված տեղեկությունն այն մասին, որ «Կրոկուս Սիթի Հոլլ»-ը ապահովագրված է «Ինգոսստրախ»-ի կողմից։ Բայց, նրա խոսքով, ապահովագրական գումարը ծածկում է «վնասի 1/30-ը, գուցե 1/40-ը», հավելելով, որ համերգասրահի սեփականատերերը «շատ տուժող կողմ են»։ ««Կրոկուս Սիթի Հոլլ»-ը մեր տունն է»,- ընդգծել է նա։ 15 տարի առաջ, հայտնել է Աղալարովը, համերգասրահի կառուցումն արժեցել է մոտ 70 մլն դոլար։ «Այսօր կարծում եմ, որ անհնար է 150 միլիոն դոլարից պակաս գումարով նման դահլիճ կառուցել»,- ասել է «Կրոկուս Սիթի Հոլլ»-ի սեփականատիրոջ որդին։