Վաչագան Ղազարյանը գումարը մուծեց,որ համաներում կիրառվի, որովհետև հոգնել էր անիմաստ քրեական գործերից․ փաստաբան

ՀՀ երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանի դեմ հարուցված քրեական գործը կարճվել է` համաներման հիմքով: Civic.am-ի հետ զրույցում տեղեկությունը հաստատեց Վաչագան Ղազարյանի փաստաբան Մհեր Հակոբյանը և նշեց, որ երբ մեղադրանք էր առաջադրվել Վաչագան Ղազարյանին, նա թեպետ մեղադրանքը չէր ընդունում, բայց որոշեց ամբողջությամբ փոխհատուցի ըստ մեղադրանքի պետությանը պատճառած վնասը:

«Վաչագան Ղազարյանը գումարը մուծեց, որպեսզի համաներում կիրառվի, որովհետև հոգնել էր անիմաստ քրեական գործերից: Գումարը վճարելը նախապայման է հանդիսացել, որ այդ հոդվածով համաներում կիրառվի»,-հավելեց փաստաբանը:
Հիշեցնենք, որ Վաչագան Ղազարյանը մեղադրվում էր ՔՕ 308 հոդվածի 2-րդ մասով: Ըստ ԱԱԾ-ի տարածած հաղորդագրության` 2008-2018 թվականներին Սերժ Սարգսյանի թիկնազորի նախկին պետը, զբաղեցնելով ՀՀ ազգային անվտանգության ծառայության պետական պահպանության ծառայության պետի առաջին տեղակալի պաշտոնը, պաշտոնեական դիրքն օգտագործել է ծառայության շահերին հակառակ, ինչն անզգուշությամբ առաջացրել է ծանր հետևանքներ:

Ըստ մեղադրանքի` Վ. Ղազարյանը, պետական միջոցները սեփական ընտանիքի շահերին ծառայեցնելու և այդ ուղղությամբ սեփական միջոցներից լրացուցիչ ծախս չկատարելու անձնական շահագրգռվածությունից ելնելով, պաշտոնեական դիրքն օգտագործել է ծառայության շահերին հակառակ, այն է` ՀՀ ԱԱԾ պետական պահպանության ծառայության ավտոտնտեսության վարորդ Ս. Ա.-ին առաջարկել է, պետական միջոցներից վարձատրություն ստանալով հանդերձ, աշխատել որպես իր կնոջ և տան վարորդ:

Ս. Ա.-ն 2015-2018 թվականների ընթացքում վարորդի ծառայություններ է մատուցել Վ. Ղազարյանի կնոջը, ինչով պայմանավորված՝ հիշյալ ժամանակահատվածում ՀՀ ԱԱԾ պետական պահպանության ծառայության ավտոտնտեսությունում առհասարակ ծառայության չի ներկայացել և ծառայողական որևէ պարտականություն չի կատարել: Չնայած դրան` Պետական պահպանության ծառայությանը հատկացված միջոցներից այդ ընթացքում Ս. Ա.-ին որպես աշխատավարձ, պարգևատրում և իրային բավարարում փաստացի վճարվել է առանձնապես խոշոր չափի՝ 9.340.677 ՀՀ դրամ, որը Վ. Ղազարյանի կողմից ամբողջությամբ վերականգնվել է: